दोस्रो पाँचथर गोल्डकप अर्को महिना

दिपक बोहोरा
पाँचथर – पाँचथर गोल्डकप फुटबल प्रतियोगिताको दोश्रो संस्करण अर्को महिना आयोजना हुने भएको छ । चैत २५ गते देखि सुरु हुने प्रतियोगितामा ए डिभिजनसहित ९ टोलीको सहभागिता रहने बिहिबार आयोजित पत्रकार सम्मेलनमा जानकारी गराइयो ।

पाँचथर क्लबको आयोजना हुने प्रतियोगिता बैशाख २ गते सम्म सञ्चालन हुनेछ । नाइन ए साइड फुटबलप्रतियोगितामा ए डिभिजन टोली जावलाखेल युथ क्लब, हेटौडाको विजय युथ, ताप्लेजुङको मिसन युनाइटेड, झापाको बिर्ता युनाइटेड, सुनसरी ११ ,डीएफसी मोरङ, रेडहर्स इलामले प्रतिस्पर्धा गर्नेछन् ।

प्रतियोगिताको विजेताले उपाधिसहित ३ लाख ५ हजार ५ सय ५५ र दोस्रो हुने टोलीले १ लाख ५ हजार ५ सय ५५ रुपैयाँ प्राप्त गर्नेछन् । अघिल्लो संस्करणमा भन्दा विजेताले पाउने क्रममा १ लाख ५ हजार ५ सय ५५ रुपया बृद्धि गरिएको आयोजक क्लबका अध्यक्ष अनुराग केप्छाकी मगरले जानकारी दिए ।

प्रतियोगितामा झन्डै २८ लाख रुपैयाँ खर्च हुने क्लबको अनुमान छ । पहिलो संस्करणको उपाधि झापाको बिर्ता युनाइटेडले जितेको थियो ।