दिपक न्यौपाने
बुटवल – तिलोत्तमा गोल्डकप फुटबल प्रतियोगिताको २० औं संस्करणको आयोजनाको सम्पूर्ण तयारी पुरा भएको रुपन्देही जिल्ला फुटबल संघले जनाएको छ । बिहीबारबाट सुरु हुने तिलोत्तमा गोल्डकपमा १० टोलीको सहभागिता रहने रुपन्देही एन्फाका अध्यक्ष कुमार केसीले बुधबार आयोजित पत्रकार सम्मेलनमा जानकारी दिएका छन् ।

प्रतियोगितामा ३ विभागिय टोली नेपाल पुलिस, त्रिभुवन आर्मी क्लब, एपिएफ, लक्ष्मी हुन्डाई मनाङ मर्स्याङ्दी, रुस्लान थ्री स्टार, सिएमजी क्लब संकटा , फ्रेन्ड्स , कास्की ११, आयोजक लाली रुपन्देही ११ र सुदुरपश्चिम ११ ले प्रतिस्पर्धा गर्नेछन् । एन्फा टेक्निकल सेन्टर देबिनगरमा सन्चालन हुने प्रतियोगिताको उद्घाटन खेल लाली रुपन्देही ११ र सुदूरपश्चिम ११ बीच हुनेछ ।

प्रतियोगिताको विजेता टोलीले ७ लाख ७७ हजार ७ सय ७७ तथा दोस्रो हुने टोलीले ४ लाख ४४ हजार ४ सय ४४ रुपैयाँ प्राप्त गर्नेछ । प्रतियोगिताका सर्वोत्कृष्ट खेलाडीले मोटरसाइकल प्राप्त गर्नेछन् भने विधागत उत्कृष्ट खेलाडीले समान २१ हजार रुपैयाँ पाउनेछन् ।

यशोदा फुड्स प्रा लि मुख्य प्रायोजक
यसैबीच, २० औ संस्करणको तिलोत्तमा गोल्डकप फुटबललाई यशोदा फुड्स प्रालीले मुख्य प्रायोजन गरेको छ । बुधबार प्रतियोगिता सम्बन्धि जानकारी दिन आयोजित पत्रकार सम्मेलनमा यशोदा फुड्सका अध्यक्ष चुन्नुप्रसाद पौडेलले तिलोत्तमा जस्तो स्थापित प्रतियोगितासँग जोडिन पाउँदा खुसी लागेको बताए । प्रायोजन सम्झौता एक वर्षको रहनेछ । प्रायोजनपछि रुपन्देहीले लाली रुपन्देहीका नाममा फुटबल प्रतियोगितामा भाग लिनेछ । यशोदा फुड्सले लाली चाउचाउको उत्पादन गर्दै आएको छ ।

तिलोत्तमालाई सहयोग
तिलोत्तमा गोल्डकपका लागि सहगोग जुट्ने क्रम सुरु भएको छ । दोस्रो पुरस्कार ४ लाख ४४ हजार ४ सय ४४ संगम पथ बुटवलका भुपु खेलाडी बिकास गुरुङले प्रदान गर्ने भएका छन् । जापानबाट चेतन बस्नेतले ४ लाख सहयोग गरेको जिल्ला संघले जनाएको छ । भुपु खेलाडी तथा खेलप्रेमीहरु राजेशआर्चाय, रवि श्रेष्ठ, कृष्ण गुरुङ, राजु क्षेत्री, इन्द्र गौचन, सम्शेर थापा, सानु केसीलगायतले आर्थिक सहयोग गरेको बताइएको छ ।