दिपक बोहोरा
पाँचथर– अखिल नेपाल फुटबल संघ (एन्फा) को केन्द्रिय समितिको निर्वाचन नजिकिदै गर्दा जिल्ला संघले कसको पक्षमा लाग्ने भनेर खुल्न थालेका छन् । चैत १४ गते हुने निर्वाचनका लागि एन्फाका वरिष्ठ उपाध्यक्ष मणी कुँवर र पूर्व उपाध्यक्ष कर्मा छिरिङ शेर्पा अलग अलग समूह बनाएर उत्रेका छन् ।

अहिले दुवै समूह आफ्नो पक्षमा मतदातालाई आकर्षित गर्नमा जुटेका छन् । यसैबीच, पूर्वी पहाडी जिल्ला पाँचथरले परिवर्तनका पक्षमा मदतान गर्ने भन्दै शेर्पा समूहलाई सहयोग गर्ने निर्णय गरेको छ । आइतबार पत्रकार सम्मेलन गर्दै पाँचथर जिल्ला संघले निर्णय सर्वजनिक गरेको हो ।

झन्डै २ दशक नेृतत्व गरेकाहरुबाट अब नेपाली फुटबलको विकास हुने सम्भावना नदेखेर शेर्पा समूहलाई सहयोग गर्न लागेको एन्फा पाँचथरका अध्यक्ष सुजन  नेम्बाङले बताए । ‘फुटबलको विकासको लागि परिर्वतन आवश्यक छ , उनले भने, त्यसैलै पाँचथरको भोट परिर्वत चाहाने पक्षमा जानेछ । पाँचथरबाट एन्फाका पूर्व केन्द्रिय सदस्य सुरेश शाह मतअधिकार प्रतिनिधि हुन् ।

एन्फाका सदस्य जिल्लाबाट ३ प्रतिनिधि रहने छन् जसमध्ये एकजनाको मताधिकार रहनेछ । ४५ जिल्लाबाट समान १, १४ ए डिभिजन क्लबबाट समान १, बी डिभिजन क्लबमध्येबाट ९, सी डिभिजन क्लबबाट ५ तथा चार समिति (खेलाडी, प्रशिक्षक, रेफ्री र महिला) समितिबाट समान १ गरि ७७ जनाले एन्फा निर्वाचनमा मत प्रयोग गर्नेछन् ।