अमृत चिमरिया
हेटौंडा– तेस्रो मेयर कप फुटबल प्रतियोगितामा वडा नं १२ र वडा नं ११ विजयी भएका छन् । हेटौंडा उपमहानगरपालिकाको आयोजनामा हेटौंडा–४ स्थित लोकतान्त्रिक खेलकुद मैदान (हुप्रचौर) मा जारी प्रतियोगितामा सोमबार पहिलो खेलमा वडा नं १२ ले वडा नं ५ को रुद्रेश्वर फुटबल टोलीलाई २–१ ले हरायो ।

३७ औं मिनेटमा अशोक घलानको पेनाल्टी गोलबाट१२ नम्बरले अग्रता लिएको थियो । सोही टोलीका ५९ औं मिनेटमा सुरज पाख्रिनले गोल गर्दै अग्रता दोब्बर बनाए । रुद्रश्वरका लागि दोस्रो हाफमा प्राप्त पेनाल्टीलाई सञ्जिव अर्यालले सदुपयोग गर्न सकेनन् । यू–१४ का राष्ट्रिय खेलाडी समेत रहेका सञ्जिवको प्रहारलाई १२ नम्बरका गोलकिपरसुचन लोप्चनले रोके ।

६९ औं मिनेटमा रुद्रेश्वरका लागि एन्जल महर्जनले गोल गरेपनि टोलीको हार टरेन । १२ नम्बरका गोलकिपर सुचन म्यान अफ दी म्याछ घोषित भए र उनलाई भ्वाइस अफ यूथ चौकीटोलको १ हजार रुपैयाँ प्रदान गर्यो ।

दोस्रो खेलमा १४ नम्बर वडाको चुरेकालिका टोलाई १–० ले हराउँदै ११ नम्बर वडाको सहीद स्मारक टोली अघिल्लो चरणम पुगेको छ । ्प्रतिस्पर्धात्मक खेलको ४८ औं मिनेटमा अजय क्षेत्रीले गरेको गोलमा स्मारक टोली विजयी भएका थियो। अज खेलेको म्यान अफ दी म्याच घोषित भए र उनलाई भ्वाइस अफ यूथ चौकीटोलको १ हजार रुपैयाँ प्रदान गर्यो ।

प्रतियोगितामा मंगलबार ८ नम्बर वडा र १७ नम्बर वडाबीच पहिलो खेल हुनेछ । दोस्रो खेल १६ नम्बर वडा र १३ नम्बर वडाको बीचमा हुने बताइएको छ । २९ गतेसम्म चल्ने प्रतियोगिताको विजेताले १ लाख ५० हजार तथा दोस्रो हुने टोलीले ७५ हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले १५ हजार तथा विधागत उत्कृष्ट खेलाडीले समान ७ हजार ५ सय रुपैंया प्राप्त गर्नेछन् ।