काठमाडौं (हाम्रो खेलकुद) – भारतमा जारी हिरो आइ-लिग अन्तिम अवस्थामा आइपुग्दा लिगमा रोमाञ्च भने कायमै रहेको छ । उपाधि जित्न मिनेर्भा पञ्जाब, नेरोका, मोहन बगान र इष्ट बेंगाल दौडमा रहेका छन् ।

मिनेर्भा पञ्जाब नेपाली गोलकिपर किरण चेम्जोङ सम्मिलित टोली हो । हाल मिनेर्भा १७ खेलमा ३२ अंकसहित तालिकाको अग्रस्थानमा रहेको छ । तर अहिले केहि फितलो नतिजाका कारण मिनेर्भा पञ्जाबलाई उपाधि गुमाउने डर छ । पञ्जाबले आफ्नो अन्तिम खेल चर्चिल ब्रदर्ससँग खेल्ने छ । अघिल्लो पटक पञ्जाब चर्चिल ब्रदर्ससँग २-१ ले हारेको थियो ।

अर्को तर्फ फरवार्ड विमल घर्ती मगर आबद्ध रहेको मोहन बगान १७ खेलमा ३० अंकका साथ तेस्रो स्थानमा रहेको छ । अन्तिम खेलमा मोहन बगानले गोकुलमको सामना गर्ने छ । त्यस खेलमा मोहन बगानले जित्नु त पर्ने नै छ, साथै अन्य नतिजा पनि उसको पक्ष्यमा जानु पर्ने हुन्छ । सिजनको अघिल्लो खेलमा मोहन बगान गोकुलमसँग २-१ ले पराजित भएको थियो ।

उपाधि होडमा रहेका अन्य टोली हुन् – नेरोका र इष्ट बेंगाल । यी दुईले एकआपसमा खेल्न पनि बाकीं रहेको छ । नेरोकाको १७ खेलमा ३१ अंक रहेको छ । त्यस्तै इष्ट बेंगालको १६ खेलमा २९ अंक रहेको छ । इष्ट बेंगालले भोलि सिलोङ लाजोङसँग पनि खेल्दै छ ।

मिनेर्भाले उपाधि जित्न के-के हुनु पर्छ?

– मिनेर्भाले आफ्नो अन्तिम खेलमा चर्चिल ब्रदर्सलाई जिते इष्ट बेंगालले नेरोका र सिलोङ लाजोङविरुद्ध जित्नु हुदैन ।

– मिनेर्भाले आफ्नो अन्तिम खेल बराबरी खेले, मोहन बगान गोकुलमसँग हार्नु पर्छ । त्यस्तै नेरोका र इष्ट बेंगालले बराबरी खेल्नु पर्छ र इष्ट बेंगालले सिलोङ लाजोङसँग हार्नु पर्ने छ वा बराबरी खेल्नु पर्ने छ ।

– मिनेर्भाले आफ्नो अन्तिम खेल हारे, नेरोकालाई इष्ट बेंगालले हराउन पर्छ र सिलोङ लाजोङविरुद्ध इष्ट बेंगाल हार्नुपर्छ । अथवा, नेरोका र इष्ट बेंगालले बराबरी खेलेर इष्ट बेंगालले फेरि सिलोङ लाजोङ विरुद्ध हार्नु पर्ने छ वा बराबरी खेल्नु पर्ने छ ।

मोहन बगानले उपाधि जित्न के-के हुनु पर्छ?

– मोहन बगानले आफ्नो अन्तिम खेल जिते, मिनेर्भा आफ्नो खेलमा हार्नु पर्छ र इष्ट बेंगालले नेरोकासँग बराबरी र सिलोङ लाजोङसँग हार्नु पर्ने छ वा बराबरी खेल्नु पर्ने छ ।

– मोहन बगानले अन्तिम खेल बराबर खेल्यो अथवा हार्‍यो भने उसको उपाधि सम्भावना समाप्त हुने छ ।