अमृत चिमरिया
हेटौंडा – हेटौंडामा तेस्रो मेयर कप फुटबल प्रतियोगिता सुरु हुँदा साविक विजेता वडा नं ७ पराजित भएको छ । शनिबार भएको उद्घाटन खेलमा पूर्व विजेता वडा नं १ को पाथिभरा फुटबल क्लबले वडा नं ७ लाई २–१ ले हराएको थियो ।

७ नम्बर फुटबल टिमले सुरुवाती अग्रता लिएपनि त्यसलाई जोगाउन सकेन । १६ औं मिनेटमा भुवन बुढाथोकीको पासमा अनिल थापाले ७ नम्बरको लागि गोल गरेका थिए । २३ औं मिनेटमा ७ नम्बरका किरण गुरुङले आत्मघाती गोल गरेपछि खेल बराबरीमा पुगेको थियो ।

५२ औं मिनेटमा पाथिभराका सुमन लामा गरेको गोल खेलको निर्णायक बन्यो । विजयी टोलीका कृष्ण लामा खेलको म्यान अफ दी म्याच बने ।
प्रतियोगितामा हेटौंडा उपमहानगरका १९ वटै वडाको सहभागिता रहेको प्रतियोगितामा आइतबार १० नम्बर वडा र १५ नम्बर वडाबीच हुनेछ । त्यस्तै अर्को खेल ३ नम्बर र १८ नम्बर वडाको बीचमा हुने आयोजकले जनाएको छ ।

हेटौंडा उपमहानगरपालिकाको आयोजना तथा जिल्ला खेलकुद विकास समितिको व्यवस्थापनमा विगत ३ बर्षदेखि वडाबीच यो प्रतियोगिता आयोजना हुँदै आएको छ । दोस्रो संस्करणसम्म हेटौंडा नगरकप फुटबलको नाममा सञ्चालन हुँदै आउको प्रतियोगिताको नाम यसपटक मेयर कप बनाइएको छ ।

जिल्ला समन्वय समिति मकवानपुरका प्रमुख रघुनाथ खुलालले प्रतियोगिताको उद्घाटन गरे । जिल्ला खेलकुद विकास समितिका अध्यक्ष माधव तिमल्सिनको अध्यक्षतामा भएको उद्घाटनमा हेटौंडा उपमहानगरपालिकाका मेयर हरिबहादुर महत, मकवानपुरका प्रमुख जिल्ला अधिकारी चक्रबहादुर बुढा, उद्योग संघ मकवानपुरका अध्यक्षनवराज अर्याल, हेटौंडा उपमहानगरपालिकाका सामाजिक विकास महाशाखा प्रमुख भीम तिमल्सिना लगायतले बोलेका थिए ।