जाकार्ता (एजेन्सी) – एएफसी कप अन्तर्गतको खेलमा रोहित चन्द सम्मेलित पर्सिजा जकार्ताले सिंगापुरको टामपाइन्स रोभर्सलाई ४-१ ले पराजित गरेको छ । पर्सिजाको जितमा नेपाली मिडफिल्डर रोहित चन्दले पुरा समय खेले ।

घरेलु मैदानको खेलमा क्रोसियाका फरवार्ड मार्को सिमिकले ह्याट्रिक गरे । खेलको १२ औं मिनेटमा उनको गोलमा पर्सिजाले अग्रता लिएको थियो । रिजाल्दी हेनाउसाले ४४ औं मिनेटमा घरेलु टोलीको अग्रता दोब्बर गरे ।

जेमीले ४८ औं मिनेटमा दोहोरो पहेलो कार्ड पाएपछि पर्सिजा १० खेलाडीमा सिमित भएको थियो । सिमिकले ७४ औं मिनेटमा पर्सिजालाई तेस्रो गोल दिलाउँदै अग्रता बलियो बनाएपनि भ्रमणकारी टोलीका खैरुल अमरीले ७७ औं मिनेटमा गोल गरेका थिए । रोहितले रोभार्सका खेलाडीले दिएको क्रस हेड मार्फत क्लियर गर्न नसकेपछि पाएको बललाई हेड गर्दै अमरीले गोलमा परिणत गरेका थिए । तर सिमिकले ८६ औं मिनेटमा गोल गर्दै ह्याट्रिक गरेपछि पर्सिजाले सहज जित निकाल्न सफल भयो ।

समूह ‘एच’ मा रहेको पर्सिजाको दोस्रो खेलमा पहिलो जित हो । यसअघि मलेसियन सुपर लिगको विजेता जोहोर दरुल फुटबल क्लबसँग ३-० ले पराजित पर्सिजा समूहको तेस्रो स्थानमा छ । दोस्रो स्थानको जोहोर दरुलको पनि २ खेलमा १ जित छ । समूहको शिर्ष टोलीले सेमिफाइनलमा स्वतः स्थान पाउने छ भने तीन समूह (एफ जी र एच) मध्येको १ उपविजेताले पनि सेमिफाइनलमा स्थान पाउनेछ ।