विनोदबाबु रिजाल
चितवन – सशस्त्र प्रहरी बलको एपीएफ क्लब चितवनको नारायणगढमा जारी १३ औं टुवोर्ग विकास रनिङ शिल्ड नकआउट फुटबल प्रतियोगिताको फाइनलमा पुगेको छ ।

बुधबार सम्पन्न पहिलो सेमिफाइनलमा सहज जित निकाल्दै एपीएफले उपाधि भिडन्त पक्का गरेको हो । आगामी १९ गते हुने फाइनलमा प्रवेश गर्न एपीएफले ललितपुरको फ्रेण्ड्स क्लबलाई ३–१ गोलअन्तरले पराजित गर्‍यो ।

स्ट्राइकर सन्तोष श्रेष्ठले पहिलो हाफमा दुई गोल र अर्को एक गोलका लागि सुन्दर मौका सिर्जना गरेपछि एपीएफको जित सहज भएको हो । सन्तोषले खेलको १० र १७ औं मिनेटमा गोेल गरे भने ३३ औं मिनेटमा रुपबहादुर लामाको गोलमा अवसर सिर्जना गरिदिए । म्यान अफ दी म्याच बनेका सन्तोषले १० हजार पुरस्कार पाए ।

पहिलो हाफमै ३ गोल खाएको फ्रेण्ड्सले दोस्रो हाफमा एक गोल फर्कायो । उसका लागि उत्कृष्ट खेल देखाएका जोनल ग्लोरीले ६४ औं मिनेटमा एकमात्र गोल गरे । ग्लोरीले दोस्रो हाफमा आक्रामक प्रदर्शन गर्दै कयौं अवसर सिर्जना गरेका थिए । तर, उनलाई साथ दिने खेलाडी निस्किएनन् ।

प्रतियोगितामा दोस्रो सेमिफाइनलमा बिहीबार दुई चर्चित ‘ए’ डिभिजन क्लब मनाङ मर्स्याङ्दी क्लबले थ्री स्टार क्लबको सामना गर्नेछ । मनाङ अघिल्ला दुवै खेल जितेर सेमिफाइनलमा पुगेको हो भने थ्री स्टारले गृहटोली नारायणगढ फुटबल क्लबलाई ३–१ गोलले मंगलबार हराएको थियो ।

प्रतियोगिताको फाइनलमा आगामी फागुन १९ गते हुनेछ । विजेताले रनिङ शिल्डसहित ५ लाख र दोस्रो हुनेले २ लाख ५० हजार रुपैयाँ नगद पुरस्कार पाउनेछन् ।