विनोदबाबु रिजाल
चितवन – ए डिभिजन क्लब फ्रेन्ड्स १३ औं टुबार्ग विकास रनिङ शिल्ड फुटबल प्रतियोगिताको सेमिफाइनलमा पुगेको छ । त्रिभुवन आर्मी क्लबलाई टाइब्रेकरमा ३–१ ले हराउँदै फ्रेन्ड्स अन्तिम चारमा पुगेको हो ।

चितवनको नारायणगढस्थित क्याम्पाचौरमा जारी प्रतियोगितामा सोमबार फ्रेन्ड्स र आमीले नियमित समयमा १–१ को बराबरी खेलेपछि निर्णायार्थ खेल टाइब्रेकरमा पुगेको थियो । तर, टाइब्रेकरमा पराजित हुँदै यो सिजन ६ नकआउट उपाधि जितिसकेको आर्मी पहिलो खेलबाट बाहिरिएको छ ।

आर्मीले शनिबार मात्र हेटौडा गोल्डकपको उपाधि जितेको थियो । पेनाल्टी सुटआउटमा आर्मीका ३ खेलाडी गोल गर्नबाट चुके भने फ्रेण्ड्सका ३ जनाले गोल गरे । यसअघि खेल सुरु भएको तेस्रो मिनेटमा विदेशी खेलाडी जोनल ग्लोरीले गोल गर्दै फ्रेण्डसले अग्रता लिएको थियो ।

निरन्तर दबाब दिइरहेको आर्मीका कप्तान प्रिन्स कार्कीले १८ औं मिनेटमा फ्रि किकमार्फत आकर्षक गोल गर्दै खेललाई बराबरीमा पु¥याए ।आर्मीले टोलीका स्टार खेलाडी भरत खवास, नवयुग श्रेष्ठ, गोलकिपर विकेश कुथुलाई आराम दिएको थियो । प्रतियोगिताको विजेताले ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ ।

विकास रनिङ शिल्डमा मंगलबारको क्वार्टरफाइनल
रुस्लान थ्री स्टार क्लबविरुद्ध नारायणगढ फुटबल क्लब