विनोदबाबु रिजाल
चितवन– एन्फा एकेडेमीको यु–१९ टोलीलाई पराजित गर्दै नारायणगढ फुटबल क्लब ९एनएफसी० नारायणगढको क्याम्पाचौरमा जारी १३ औं टुवोर्ग विकास रनिङ शिल्ड नकआउट फुटबल प्रतियोगिताको क्वार्टरफाइनलमा प्रवेश गरेको छ । अत्यन्तै प्रतिस्पर्धात्मक खेलमा सडन डेथमा को जित निकाल्दै एनएफसीले अन्तिम ८ को यात्रा तय गरेको हो ।

निर्धारित समयको खेलमा कुनैपनि गोल हुन नसकेपछि गरिएको पेनाल्टी सुटुआउटमा पनि ३–३ को बराबरी भएको थियो । टाइब्रेकरमा २ गोलले अघि रहेको बेला एन्फाका सञ्जीव अर्याल र रोशन रानामगरले लगातारको प्रहार मिस गरे । तर, नारायणगढका राजेश परियारले सुन्दर गरेपछि खेल ३–३ को बराबरीमा पुग्यो ।

त्यसअघि एन्फाका पदम भट्टराई, रोशन दोङ र असिम गुरुङले लगातार गोल गरेका थिए । नारायणगढका सुदन महतो र पुकार आलेले गोल गरेपनि सविन विडारी र अमृत श्रेष्ठको प्रहार गोल हुन सकेन । त्यसपछि सडन डेथमा नारायणगढका यदु सिलवालले हानेको गोललाई एन्फाका अशोक किङरिङले बराबरी गरे । तर, त्यसपछि नारायणगढका कप्तान कुशल श्रेष्ठले गोल गरेपनि एन्फाका अञ्जल महर्जनले गोल गर्न नसकेपछि एन्फाले खेल गुमायो ।

खेल अवधिभर सुन्दर बचाउ गरेका एन्फाका गोलकिपर विशाल सुनार म्यान अफ दी म्याच घोषित भए । उनलाई पूर्वखेलाडी तथा वरिष्ठ कलाकार ऋद्धिचरण श्रेष्ठले १० हजार पुरस्कार प्रदान गरे । प्रतियोगितामा बिहीबार विभागिय टोली सशस्त्र प्रहरीको एपीएफ क्लब र चितवनको अर्को टोली भरतपुर फुटबल क्लब (बीएफसी) बीच प्रतिस्पर्धा हुने आयोजकले जनाएको छ । प्रतियोगितामा कूल १२ टिमको सहभागिता छ ।

चितवनकै सर्वाधिक धनराशी पुरस्कार भएको यस प्रतियोगिताको विजेताले ५ लाख रुपैयाँ र शिल्ड प्राप्त गर्नेछ भने उपविजेता टिमले २ लाख ५० हजार रुपैयाँ पुरस्कार पाउने छ । दर्शकको सहजताको लागि मैदानमा प्याराफिटको व्यवस्था गरिएको छ ।