विनोदबाबु रिजाल
चितवन– ए डिभिजन टोली फ्रेण्ड्सले विकास रनिङ शिल्ड अन्तर्रा्ष्ट्रिय आमन्त्रण फुटबल प्रतियोगितामा विजयी सुरुआत गरेको छ । हेटौंडाको विजय युथ क्लबलाई मंगलबार १–० ले हराउँदै फ्रेण्ड्स प्रतियोगिताको क्वार्टरफाइनलमा पुगेको छ । फ्रेन्ड्सले क्वार्टरफाइनलमा त्रिभुवन आर्मी क्लबको सामना गर्नेछ ।

जोनल ग्यारीले २९ औं मिनेटमा गरेको गोल खेलको निर्णायक बनेको थियो । म्यान अफ दी म्याच घोषित भएका ग्यारीले १० हजार रुपैयाँ प्राप्त गर्नेछ । त्यसअघि पूर्व प्रधानमन्त्री पुष्पकमल दाहालले प्रतियोगिताको उद्घाटन गरे । दाहालले क्याम्पाचौरमा मिनी रंगशाला बनाउन पहल गर्ने प्रतिबद्धता जनाए ।

माओवादी केन्द्रका अध्यक्ष दाहालले दुई ठूला कम्युनिष्ट पार्टी एक भएकाले अब राजनीतिक स्थायित्व र आर्थिक विकाससँगै खेलकुद क्षेत्रको पनि विकास हुने बताए । नेकपा एमाले र नेकपा माओवादी केन्द्रबीच एकता भएर नेपाल कम्युनिष्ट पार्टी नामाकरण गरिने सोमबार सहमति भएको थियो ।

१२ टोलीको सहभागिता रहेको विकास रनिङ शिल्डको विजेताले ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले ५० हजार रुपैयाँ पाउने प्रतियोगिताको क्वार्टरफाइनल पुग्ने टोलीले बोनस स्वरुप १० हजार रुपैयाँ पाउने विकास शिल्ड समितिका अध्यक्ष श्याम पियाले जानकारी दिए ।

विकास रनिङ शिल्डमा बुधबारको खेल
नारायणगढ फुटबल क्लबविरुद्ध एन्फा एकाडेमी