हेटौंडा (हाम्रो खेलकुद) – तेस्रो टुबोर्ग हेटौंडा गोल्डकप फुटबल प्रतियोगिताको चौथो क्वाटरफाइनल खेलमा सीएमजी संकटाले रुस्लान थ्रीस्टारलाई १-० ले हराएको छ ।

संकटाको जितमा क्लबसँगै हालै टोलीमा सम्मिलित खेलाडी कर्ण लिम्बुले निर्णायक गोल गरे । पहिलो हाफ गोलरहित सकिए पनि दोस्रो हाफको ८३ औं मिनेटमा कर्ण लिम्बुले गोल गर्दै टोलीलाई जित दिलाए ।

खेलको २१ औं मिनेटमा अजयी मार्टिन्सको प्रहार विनय श्रेष्ठले आकर्षक बचाऊ गरेका थिए । ४१ औं मिनेटमा संकटाका प्रकाश बुढाथोकीको हेडर थ्रीस्टारका गोलकिपर एलेन न्यौपानेले बचाऊ गरे भने त्यसको एक मिनेटपछि थ्रीस्टारका लागि मार्टिन्सको वन-अन-वन विनय श्रेष्ठले फेरी बचाऊ गरे । पहिलो हाफ सकिन अघि सुनिल बलको कर्नरमा निरज बस्नेतले हेडिङ गरेपनि सो प्रहार विफल भएको थियो ।

त्यस्तै दोस्रो हाफको ५९ औं मिनेटमा विश्व अधिकारीको कर्नर एलेनले बचाऊ गरे भने ८९ औं मिनेटमा सुनिलको प्रहार क्रसबारमा लाग्दा थ्रीस्टारले खेल बराबर गर्ने मौका गुमाएको थियो । ९० औं मिनेटमा कर्णको प्रहार पनि क्रसबारमा लागेर फर्केको थियो ।

थ्रीस्टारका प्रशिक्षक मेघराज केसीले पाएका अवसरहरुलाई सदुपयोग गर्न नसक्दा हार्न पुगेको बताए । आज खेलाडीहरु फिट नभएका कारण विश्राम दिँदा र विपक्षी संकटा डटेर खेल्दा पराजय भोग्नुपरेको पनि केसीले थपे ।

त्यस्तै विजयी टोली संकटाका प्रशिक्षक सल्यान खड्गीले पनि रणनीति बनाएर खेल्दा लयमा रहेका निराजन खड्कालाई रोक्न सफल भएको बताए । आफ्नो टोलीको प्रदर्शनबाट खुशी रहेको र आगामी प्रतियोगितामा पनि सो जारी राख्न कोसिस गर्ने खड्गीले खेलपछिको पत्रकार सम्मेलनमा जानकारी गराए ।

खेलमा निर्णायक गोल गरेका कर्ण लिम्बु नै खेलको म्यान अफ द म्याच पनि चुनिए । यस जितसँगै संकटाले प्रतियोगिताको दोस्रो सेमिफाइनल खेलमा नेपाल पुलिस क्लबसँग प्रतिस्पर्धा गर्ने छ।