काठमाडौं (हाम्रो खेलकुद)– नेपाली राष्ट्रिय फुटबल टोलीका गोलकिपर किरण चेम्जोङको मिनेर्भा पञ्जाब एफसी हिरो इन्डियन लिगमा (आइ लिग) मंगलबार गोकुलमको सामना गर्दैछ । खेल भारतीय समय अनुसार दिउँसो २ः१५ बजे सुरु हुनेछ ।

इष्ट बंगालसँगको अघिल्लो खेलमा १–० ले हार बेहोरेको मिनेर्भा आजको खेलमा सफलता प्राप्त गर्न सके पुनः आइलिगको शीर्षस्थानमा उक्लनेछ । शीर्षस्थानको नेरोकाभन्दा ३ खेल खेलेको मिनेर्भाको २९ अंक छ । १७ खेलमा नेरोकाको ३१ अंक छ ।

१० टोलीको सहभागिता रहेको आइ लिगमा इष्ट बंगाल २६ अंकसहित तेस्रो र नेपाली फरवार्ड विमल घर्ती मगर सम्मिलित मोहन बगान २४ अंकसहित चौथो स्थानमा छ । १६ अंक जोडेको गोकुलम आठौं स्थानमा छ ।

किरण इष्ट बंगालसँगको खेलमा पहिलो रोजाइमा पर्न सकेका थिएनन् । गोल खाएलगत्तै मिनेर्भाले राक्सित डागरको ठाँउमा किरणलाई मैदान उतारेको थियो । किरण मिनेर्भा गएयता टोलीको यो छैटौं खेल हो ।

सुरुका तीन खेलमा पहिलो रोजाइमा रहेका किरण सिलोङ लाजोङसँगको खेलमा भने बेन्चमा थिए । लोजोङलाई मिनेर्भाले ३–२ ले हराएको थियो । किरणको डेब्यूमा निरोकालाई १–० ले हराएको मिनेर्भा त्यसपछिको खेलमा इष्ट बंगालसँग २–२ को बराबरीमा रोकिएको थियो । त्यसपछिको चर्चिल ब्रदर्शसँगको खेल भने मिनेर्भाले २–१ ले गुमाएको थियो ।