हेटौंडा (हाम्रो खेलकुद)– राष्ट्रिय फुटबल टोलीका पूर्व स्ट्राइकर कर्ण लिम्बु तेस्रो टुबोर्ग हेटौंडा गोल्डकप फुटबल प्रतियोगितामा  सिएमजी क्लब संकटाबाट खेल्ने भएका छन् । आज हुने रुस्लान थ्री स्टार संगको खेलमा झापाका कर्ण उत्रने संकटाका प्रशिक्षक सल्यान खड्गीले हाम्रो खेलकुद डट कमलाई जानकारी दिएका छन् ।

 

 

 

पछिल्लो ४ गोल्डकपको फाइनल खेलेको थ्री स्टार केहि थकित देखिएको छ र आज हुने खेलमा थ्रीस्टारका प्रशिक्षक मेघ राज केसीले आफ्ना केहि नियमित सुरुआत गर्ने खेलाडीलाई बिश्राम दिएर नयाँ खेलाडीहरुलाई उतार्ने जानकारी दिए। ‘लगातारको प्रतियोगिताले खेलाडीमा केहि थकान त छ,’ उनले भने,’ तर हामीसंग केहि राम्रा युवा खेलाडीहरु छन्। आज हामी उनीहरुलाई आफुलाई साबित गर्ने मौका दिनेछौ।’ थ्री स्टार क्लबले यस वर्ष ४ फाइनल खेल्दै २ मा हार बेहोरेको थियो भने २ मा जित हात परेको थियो।

अघिल्लो साता सिमरा गोल्डकपको पहिलो चरणमै वीरगन्ज युनाइटेडसँग पराजित हुँदै प्रतियोगिताबाट बाहिरिएको संकटा क्लबका प्रशिक्षक खड्गी आजको खेलको लागि आशावादी देखिएका छन् । ‘सिमरामा खेले भन्दा दुई  नयाँ खेलाडी थपिएका छन्। कर्ण  हेटौंडा आइसकेका छन्’, उनले भने, ‘त्यसैले सफल नतिजाको आशा राखेका छौं ।’ यो सिजन सिएमजी क्लब संकटा क्लबले २ फाइनल खेल्ने क्रममा १ मा जित हात पारेको थियो।

तेस्रो टुबोर्ग हेटौंडा गोल्डकप फुटबल प्रतियोगिताको यो चौथौ क्वार्टर फाइनल खेल हो र यस खेलको विजेताले दोस्रो सेमिफाइनल खेलमा नेपाल पुलिस क्लबसँग प्रतिस्पर्धा गर्ने छ। थ्री स्टारले साढे १ बर्ष पछि पुनरागमन गर्दा यि दुई टोलीले एक आपसमा खेल्न लागेको पहिलो पटक हो ।