हेटौंडा (हाम्रो खेलकुद)– त्रिभुवन आर्मी क्लबका कप्तान भरत खवासले चोटका वावजुद सोमबारको खेल पुरै खेले । तेस्रो टुबोर्ग हेटौंडा गोल्डकप नकआउट फुटबल प्रतियोगितामा सुदूरपश्चिमविरुद्धको क्वाटरफाइनलमा टाउकोमा चोट लागेको थियो । पहिलो हाफको अन्तिम मिनेटमा बल चेज गर्ने क्रममा विपक्षी खेलाडीसँग ठोक्किदा चोट लागेको थियो ।  

दोस्रो हाफमा टाउकोमा पट्टि लगाउँदै मैदानमा उत्रेका भरतले नवयुग श्रेष्ठको गोलका लागि पास समेत मिलाएका थिए । टाउकोको चोटमा अझै दुखाई बाँकी रहेपनि सेमिफाइनल खेल्न कुनै बाधा नहुने भरतले बताए । राष्ट्रिय फुटबल टोलीका फरवार्ड समेत रहेका उनले भने, सुरुमा निकै दुखेको थियो । तर चोट गम्भिर छैन । मेडिकल टिमले चोट खासै ठूलो नभएको र खेल्न बाधा नहुने बताएको छ ।

पछिल्ला केहि खेलमा गोल गर्न असफल भरतले मोफसलका प्रतियोगिताहरुमा आर्मीका लागि फरक भूमिका सहयोग गरिरहेका छन् । आफै गोल गर्न संघर्ष गरिरहँदा टोलीका अन्य खेलाडीलाई गोल गर्न वातावरण मिलाउनमा उनी मेहनत गरेको देखिन्छ ।

टोलीको प्रदर्शनमा खुसी ब्यक्त गर्दै खवासले भने, ‘म अहिले व्यक्तिगत गोल गर्न भन्दा पनि टिमको सफलताको लागि खेलिरहेको छु । आर्मीको अग्रपंक्ति उत्कृष्ट छ र म टिमलाई लयमा राख्न जुनसुकै पोजिसनमा खेल्न पनि तयार छु ।

हेटौंडा गोल्डकप आर्मीको यो सिजनमा दसौं नकआउट फुटबल प्रतियोगिता हो । गत शनिबार रुस्लान सिमरा गोल्डकपसहित नवीन न्यौपानेको प्रशिक्षणमा रहेको आर्मीले यो सिजन ५ वटा नकआउट फुटबलको उपाधि जितिसकेको छ ।

हेटौैडा गोल्ड कपमा आर्मीसहित अर्को विभागिय टोली नेपाल पुलिस क्लब, लक्ष्मी हुन्डाई मनाङ मस्र्याङ्दी क्लब अन्तिम चारमा पुगिसकेका छन् । सेमिफाइनल पुग्ने अन्तिम टोलीको टुंगो मंगलबार लाग्नेछ । मंगलबार सिएमजी क्लब संकटा र रुस्लान थ्री स्टारबीच अन्तिम क्वार्टरफाइनल खेल हुनेछ ।