बार्सिलोना (एजेन्सी) – बार्सिलोनाका पूर्व स्टार खेलाडि जाभी हर्नान्डेजले हालै सम्पन्न रियल विरुद्ध पिएसजीको च्याम्पियन्स लिग खेलमा नेयमारको प्रदर्शन क्रिस्टियानो रोनाल्डोभन्दा राम्रो रहेको बताएका छन् । सो खेलमा रोनाल्डोले २ गोल गर्दा रियलले पिएसजीलाई ३-१ ले हराएको थियो ।

३७ वर्षीय जाभीले सो फुट पत्रिकासँगको अन्तर्वार्तामा भने,”क्रिस्टियानो त्यस खेलमा नेयमारभन्दा राम्रो थिए भनियो । तर रोनाल्डोले पेनाल्टि गोल र घुंडाले गोल गर्नु बाहेक खेलमा के गरे र? अर्को तर्फ नेयमारले कैयौं अवसर सिर्जना गरे र उनको काउन्टर अट्याकले रियल पनि भयभित भएको थियो ।”

जाभीको यस्तो प्रतिक्रियाले रियलका प्रशंसकहरुलाई पनि खुशी बनाउने पक्कै छैन । पहिले पनि जाभीले लियोनल मेस्सी रोनाल्डोभन्दा राम्रो रहेको बताउंदै रियल समर्थकमाझ नराम्रो छवि छोडेका छन् ।”

रोनाल्डो यस सिजन लिगमा आशा गरिएको जस्तो लयमा छैनन् तर च्याम्पियन्स लिगमा उनको प्रदर्शनहरुले भने निकै प्रशंसा पाएको छ । अर्को तर्फ फ्रान्सेली लिग १ मा शानदार लयमा रहेका नेयमारले रियलविरुद्धको महत्त्वपूर्ण खेलमा प्रभावकारी प्रदर्शन दिन नसकेको आलोचना आएको छ ।

रियल र पिएसजी अब मार्च ६ मा पिएसजीको घरेलु मैदान पार्क डेस प्रिन्समा भिड्ने छन् ।