चितवन (हाम्रो खेलकुद) – विकास रनिङ शिल्ड अन्तर्राष्ट्रिय आमन्त्रण फुटबल प्रतियोगिता फागनु ८ गतेबाट सुरु हुने भएको छ । नारायणगढको क्याम्पाचौरमा विकास शिल्ड समितिले आयोजना गर्ने प्रतियोगिताको सबै तयारी अन्तिम चरणमा पुगेको आयोजकले पत्रकार सम्मेलन गरी जानकारी दिएको छ ।

कूल १२ टिम सहभागी हुने प्रतियोगितामा गत वर्षभन्दा पुरस्कार राशी बढाइएको छ । गत वर्ष विजेतालाई ३ लाख रुपैयाँ मात्रै दिइएको यो खेलमा यसपालि ५ लाख दिइनेछ । त्यस्तै गत वर्ष डेढ लाख पाएको दोस्रोले यसपालि साढे २ लाख पाउनेछ । त्यस्तै बेस्ट खेलाडीले ५० हजार पाउनेछन् । प्रत्येक म्यान अफ दी म्याचले १० हजार रुपैयाँ पुरस्कार पाउने र प्रि–क्वार्टर र क्वार्टरफाइनल जित्ने टिमले म्याच बोनस १० हजार रुपैयाँ पाउने विकास शिल्ड समिति अध्यक्ष श्याम पियाले जानकारी दिए ।

प्रतियोगितामा देशका ठूला क्लबहरु सहभागी हुँदैछन् । थ्रीस्टार, मनाङ मर्स्याङ्दी, संकटा, फ्रेण्ड्स, तीन विभागीय टोली नेपाल आर्मी, सशस्त्र प्रहरीको एपीएफ क्लब र नेपाल पुलिस क्लब, भारतको चर्चित क्लब सिक्किम ब्वाईज, सुदूरपश्चिमाञ्चल क्लब र विजय युथ हेटौंडा तथा चितवनका नारायणगढ फुटबल क्लब (एनएफसी) र भरतपुर फुटबल क्लब(बीएफसी)ले सहभागिता जनाउँदैछन् । तिनीहरुलाई दुई समूहमा विभाजन गरिएका छन् ।

विकास शिल्डका लागि क्याम्पाचौरमा निकै सुधार गरिएको छ । खाल्डाखुल्डी र माटोको चौर हरियो पारिएको छ भने निकै मेहनतका साथ सम्याइएको छ । खेल हेर्न गतसाल जस्तै प्याराफिट बनाइएको छ । त्यसमा कम्तीमा १ हजार ८ सय जना दर्शकले एकैपटक खेल हेर्न सक्नेछन् । त्यसका लागि फरक–फरक दरका टिकट व्यवस्था गरिएका छन् । पहिलो चरणमा भन्दा दोस्रो चरणमा टिकटको दर बढी गरिनेछ ।

विकास शिल्ड पहिलोपटक विक्रम संवत २०३१ सालमा गरिएको थियो । २०५७ सालमा ११ औं संस्करण गरिएपछि रोकिएको यो प्रतियोगितालाई गतवर्षबाट फेरि सुरु गरिएको थियो । नयाँ संस्करणमा संकटा गतवर्षको विजेता हो ।