काठमाडौं (हाम्रो खेलकुद)– अखिल नेपाल फुटबल संघ (एन्फा) को अध्यक्षमा नयाँ अनुहार आउने निश्चित भएको छ । अर्को महिना हुने एन्फा अध्यक्षको निर्वाचनमा वरिष्ठ उपाध्यक्ष मणि कुँवर र पूर्व उपाध्यक्ष कर्मा छिरिङ शेर्पाबीच प्रतिस्पर्धा हुने भएकोले एन्फा अध्यक्षमा नयाँ अनुहार आउने पक्का भएको हो ।

एन्फाका वर्तमान अध्यक्ष नरेन्द्र श्रेष्ठले कुवँरलाई र अध्यक्षको उम्मेदवारी घोषणा गरेका कृष्ण थापाले शर्पालाई समर्थन गरेसँगै अब एन्फा अध्यक्षमा २ जनाका बीचमा प्रतिस्पर्धा हुनेछ । अर्का अकांक्षीका रुपमा हेरिएका एन्फाका पूर्व प्रमुख कार्यकारी अधिकृत इन्द्रमान तुलाधारले पनि यसपटक शेर्पालाई समर्थक गरेका छन् । उनी यसअघि संस्थापन पक्षका मुख्य व्यक्ति रहेका थिए ।

गत साता उम्मेदवारी घोषणा गरेका शेर्पा आज उम्मेदावरी दर्ता गर्दैछन् । उम्मेदवारी दर्ता पछि कुवँरले आज दिउँसो घोषणा सभा गर्ने तयारी गरेका छन् । चैत १४ गते का लागि हुने निर्वाचनका लागि उम्मेदवारी दर्ताको आज अन्तिम दिन हो । अध्यक्ष पदका लागि औपचारिक रुपमा उम्मेदवारी दिने घोषणा भएपनि दुवै आकांक्षीले आन्तरिक रुपमा प्यानल बनाएका छन् । शर्पाले आफ्नो प्यानल बन्ने घोषणा गरिसकेका छन् भने कुवँरले पनि आज आफ्नो मात्र उम्मेदवारी सर्वाजनिक गर्ने भएपनि प्यानल बन्ने सम्भावना स्वीकारे ।

विगतमा १७ सदस्यीय कार्यसमितिका लागि ६० जना सम्मको उम्मेदवारी पर्ने गरेको एन्फामा अन्त्यमा सर्वसम्मत नेतृत्व चयन हुने परम्परा थियो । तत्कालिन एन्फा अध्यक्ष गणेश थापाको बहिर्गमनसँग एन्फाको सर्वसम्मतको अन्त्य भइसकेको छ र प्रतिस्पर्धा सुरु भइसकेको छ । गत वर्ष थापालाई फिफाले १० वर्षको प्रतिबन्ध र झन्डै २१ लाख रुपैयाँको जरिवाना तोकेपछि पहिलो पटक गत वर्ष अध्यक्ष र एक उपाध्यक्षमा बाँकी कार्यकालका लागि निर्वाचन भएको थियो ।

गत वर्ष मंसिरमा उपाध्यक्षमा राजीनामा दिदै शर्पाले अध्यक्षमा नरेन्द्र श्रेष्ठसँग प्रतिस्पर्धा गरेका थिए । रिक्त उपाध्यमा कुवर, उपेन्द्रमान सिंह र दीपक खाती उपाध्यक्षमा लडेका थिए । जसमा संस्थापन पक्ष श्रेष्ठ र कुँवर निर्वाचित भएका थिए । गत वर्ष ५ मतले पराजित भएका शर्पाकै समूहबाट उपेन्द्रमान यसपटक पुनः उपाध्यक्षमा निर्वाचन लड्ने तयारीमा छन् ।

अध्यक्ष श्रेष्ठले भने आफ्नो समर्थन कुवरलाई रहने बताएका छन् । ‘हामीले सुरु गरेका कतिपय काम पुरा गर्न पनि संस्थापनकै उम्मेदवारलाई मेरो समर्थन हुनेछ,’ श्रेष्ठले भने, ‘म यसपटक उम्मेदवार बन्दिन । श्रेष्ठले प्रतिस्पर्धा दुई समूहकैबीचमा हुने सम्भावना रहेको बताए ।’

शेर्पाको समूहबाट पंकज नेम्बाङ, उपेन्द्रमान, वीरबहादुर खड्का, कृष्ण थापालगायतले उपाध्यक्षमा उम्मेदवारी दिने सम्भावना रहेको बताइएको छ । कुँवर समूहबाट गणेश चन्द, गणेश भट्टराईलगायतलाई सम्भावित उम्मेदवारका रुपमा हेरिएको छ । सदस्यमा भने दुवैतर्फ आकंक्षी धेरै रहेको बुझिएको छ ।