काठमाडौं (हाम्रो खेलकुद) – फिफाले आज सार्वजनिक गरेको वरियतामा नेपाल अघिल्लो महिना सरह १ सय ६५ औं स्थानमा रहेको छ । विश्वको शीर्ष १७ टोलीमा पनि केहि परिवर्तन छैन ।

दुई महिना अघिको वरियतामा १ सय ७१ औं स्थानमा रहेको नेपाल अघिल्लो महिना ६ स्थान माथि उक्लिँदै १ सय ६५ औं स्थानमा पुगेको थियो । यस महिना भने नेपालले आफ्नो सो वरियता कायम गरेको छ ।

दक्षिण एसियामा पनि नेपाल चौथो स्थानमै रहेको छ । भारत १ सय २ स्थानमा रहेको छ भने अफगानिस्तान १ सय ४८ औं स्थानमा यथावत रहँदै दक्षिण एसियामा दोस्रो स्थानमा छ । त्यस्तै माल्दिभ्स १ सय ५० औं स्थानमा रहेको छ । नेपालभन्दा कम वरियता भएका दक्षिण एसियाली मुलुकमध्ये भुटान १ सय ८८ औं स्थानमा, बंगलादेश १ सय ९७ औं स्थान, श्रीलंका २ सयौं स्थान र पाकिस्तान २ सय ३ औं स्थानमा रहेका छन् ।

विश्व वरियतामा शीर्ष १७ सम्म कुनै परिवर्तन भएको छैन । शीर्ष वरियतामा विश्वविजेता जर्मनी रहेको छ । ब्राजिल, पोर्चुगल, अर्जेन्टिना, बेल्जियम, स्पेन, पोल्याण्ड, स्वीट्जरल्याण्ड, फ्रान्स र चिली शीर्ष १० स्थानमा रहेका छन् । पेरु, डेनमार्क, कोलम्विया, इटाली, क्रोएसिया, इङ्ग्ल्यान्ड र मेक्सिको ११ देखि १७ औं स्थानमा यथावत रहेका छन् ।

सबैभन्दा बढि वरियता खस्किने देशमा इजिप्ट रहेको छ । ३० औं स्थानमा रहेको इजिप्ट यो महिना ४३ औं स्थानमा पुगेको छ । त्यस्तै वरियतामा सबैभन्दा धेरै माथि चढ्ने देशमा कङ्गो रहेको छ । अघिल्लो महिना ९६ औं स्थानको कङ्गो अहिले ८८ औं स्थानमा पुगेको छ ।