म्याड्रिड (एजेन्सी) – च्याम्पियन्स लिगको अन्तिम १६ को पहिलो लेग अन्तर्गत रियल म्याड्रिडको घरेलु मैदान सान्टियागो बर्नबाउमा आज रियल र पिएसजी भिड्दै छन् । सो खेल नेपाली समय अनुसार रातिको साढे १ बजे सुरु हुने छ ।

रियल र पिएसजीको आजको च्याम्पियन्स लिग खेल ‘एल क्लासिको’ पछी सिजनकै सबैभन्दा प्रतिक्षित खेल हो । रियल म्याड्रिडले पछिल्ला दुई सिजन च्याम्पियन्स लिग उपाधि लगातार जित्दै इतिहासको पानामा आफ्नो नाम अझै गाढा बनाउन सफल भएको छ । तर यो सिजन रियल सोचेजस्तो लयमा छैन ।

अर्को तर्फ पिएसजी भने घरेलु लिग तथा च्याम्पियन्स लिगको समूह चरणमा निकै राम्रो लयमा देखिएको थियो । पिएसजीका स्टार खेलाडि नेयमार यस सिजनपछि रियल जाने हल्ला निकै व्यापक छ । उनी आजको खेलको केन्द्रविन्दुमा रहने पक्का छ । उनलाई किलियन बाप्पे र एडिन्सन काभानीले अग्रपंक्तिमा साथ दिने छन् ।

सिजन खराब चले पनि यसै साता रियलले रियल सोसाइडाडलाई ५-२ ले हराएको थियो जसमा रोनाल्डोले ह्याट्रिक गरेका थिए । सो ह्याट्रिक उनी लयमा फर्केको सङ्केत पनि हुन सक्छ । उनलाई ग्यारेथ बेल र करिम बेन्जेमाले अग्रपंक्तिमा साथ दिने छन् ।

समर्थक र प्रशंसकहरुले यस खेलको महिनौंदेखि प्रतिक्षा गरिरहेका छन् । टिकट खुलेको केहि समयमा नै पुरा ८० हजार टिकट खरिद भइसकेको थियो । दुई वर्षदेखि यी दुई टोलीको भेट हुँदा पिएसजी ३-१ ले विजयी भएको थियो । दुवै टोली युरोपका ठूला नाम भएका कारण आज यस खेलबाट निकै अपेक्षा गरिएको छ ।