धरान (हाम्रो खेलकुद) – लगातार दोस्रो साता रुस्लान थ्री स्टार क्लब र नेपाल पुलिस क्लबबीच नकआउट फुटबल प्रतियोगिताको उपाधिका लागि भिडन्त हुने भएको छ । भारत कोलकाताको दुर्गापुर स्टिल एफसीलाई बिहीबार १–० ले हराउँदै थ्री स्टार २० औं बुढासुब्बा रेडबुल गोल्डकपको फाइनलमा पुगेको छ ।

तस्बिर सौजन्य : दीलिप राई ।

परिवर्तित खेलाडी विष्णु गुरुङको गोलमा थ्री स्टारले लगातार तेस्रो साता तेस्रो नकआउटको फाइनल यात्रा तय गरेको हो । रक्षक अनन्त तामाङको ठाँउमा ७३ औं मिनेटमा मैदान प्रवेश गरेका विष्णु खेलको नायक बने । उनले इन्जुरी समयको तेस्रो मिनेटमा गोल गर्दै थ्री स्टारलाई वर्षको दोस्रो उपाधितर्फ अघि बढाएका हुन् । थ्री स्टारका गोलकिपर एलन न्यौपानेले म्यान अफ दी म्याच घोषित हुँदै १० हजार रुपैयाँ प्राप्त गरे ।

भारतीय क्लब दुर्गापुर स्टिल एफसीविरुद्ध निर्णायक गोल गर्ने रुस्लान थ्री स्टारका विष्णु गुरुङ ।

सिएमजी क्लब संकटालाई बुधबार २–१ ले हराउँदै पुलिस लगातार दोस्रो साता नकआउट फुटबल प्रतियोगिताको उपाधि नजिक पुगेको हो । पुलिस र थ्री स्टारले गत शनिबार पोखरामा १६ औं आहा रारा गोल्डकप फुटबल प्रतियोगिताको फाइनल खेलेका थिए ।

जहाँ पुलिस १–० ले विजयी भएको थियो । त्यहाँबाट दुवै टोली धरान यात्रामा निस्केका थिए । धरानमा पुलिसले पहिलो खेलमा काकरभिट्टा ट्रेनिङ सेन्टरलाई हराएको थियो ।

थ्री स्टारले सुदूरपश्चिम ११ लाई ४–० ले हराउँदै दुर्गापुरसँगको सेमिफाइनल भेट पक्का गरेको थियो । दुर्गापुर आयोजक धरान फुटबल क्लबलाई सडन डेथमा हराउँदै अघि बढेको थियो । डेढ वर्षपछि घरेलु फुटबलमा पुनरागमन गरेयता थ्री स्टारको यो चौथो प्रतियोगिताका हो ।

पहिलो प्रतियोगिताका रुपमा रहेको नेपाल आइस सुदूरपश्चिम खप्तड गोल्ड कपको क्वार्टरफाइनल खेलेको थ्री स्टार अर्को साता मदन स्मृति इटहरी गोल्ड कपको च्याम्पियन बनेको थिए । त्यसको एकसातामा टोलीले आहा गोल्ड कपको फाइनल पुगेको थियो ।

आज भारतीय क्लबलाई हराउँदै टोलीले लगातार फाइनलको यात्रा तय गरेको छ । शनिबार हुने प्रतियोगिताको फाइनलको विजेताले उपाधिसहित ६ लाख रुपैयाँ प्राप्त गर्नेछ ।