विमलको टोली मोहन बगान विवादस्पद खेलमा चेन्नाईसँग रोकियो

काठमाडौं (हाम्रो खेलकुद) – हिरो आइ लिगमा मोहन बगान चेन्नाई सिटीसँग गोलरहित बराबरीमा रोकिएको छ । रेफ्रिले गलत खेलाडिलाई रातो कार्ड दिँदै मैदानबाट बाहिर निकालेपछि खेलमा विवाद उत्पन्न भएको थियो ।

विमल पहिलो खेलजस्तै यस खेल पनि बेन्चबाट सुरुवात गरेका थिए । तर मोहन बगानका अजहरुदिन मलिकको साटो विमल खेलको ३४ औं मिनेटमा मैदान प्रवेश गरेका थिए ।

दायाँ विङमा खेलेका विमल खेलमा शान्त र खासै संलग्न देखिएनन् । उनले खेलभरी निकै थोरै मौका पाए । खेलको ५७ औं मिनेटमा विमलले पोस्ट अगाडि कठिन अवसर पाएका थिए तर उनको प्रहार आकाशिएको थियो ।

खेलको अन्तिम समयतिर भने खेलमा लामै विवाद उत्पन्न भयो । मोहन बगानले खेलको ८० औं मिनेटमा पेनाल्टी पाए पनि अक्रम मोघ्राबि चुकेका थिए । त्यस पेनाल्टी बचाऊ भएको भन्दै चेन्नाईका खेलाडि उत्तेजित हुँदा रेफ्रिले तारिफ अखान्डलाई खेलको दोस्रो तथा एड्विन भ्यान्सपललाई खेलको पहिलो पहेंलो कार्ड देखाए ।

तर अखान्डको साटो रेफ्रिले भ्यान्सपललाई रातो कार्ड देखाउँदा खेलमा तनाव भएको थियो । यस बराबरीसँगै मोहन बगान तालिकाको चौथो स्थानमा यथावत् रहेको छ ।