काठमाडौं (हाम्रो खेलकुद)– नेपाली राष्ट्रिय फुटबल टोलीका गोलकिपर किरण चेम्जोङको मिनेर्भा पञ्जाब एफसीले बुधबार सफलता प्राप्त गर्दै इन्डियन लिग (आइलिग) को अंकतालिकाको पुनः शीर्षस्थानमा उक्लेको छ ।

बाली गगनदिपले २ गोल गरेपछि सिलोङ लाजोङलाई ३–२ ले हराउँदै मिनेर्भा अंकतालिकाको पुनः अग्रस्थानमा उक्लेको हो । बराबरी उन्मुख खेल सकिन ९ मिनेट बाँकी रहँदा घरेलु टोलीका गगनदिपले गरेको गोल खेलको निर्णायक बनेको थियो ।

मिनेर्भाले पहिलो हाफमै २ गोलको अग्रता लिएपनि त्यसलाई जोगाउन भने सकेन । गाइ एरिक डानोको गोलबाट छैटौं मिनेटमा अग्रता लिएको मिनेर्भाका लागि पहिलो हाफको इन्जुरीमा समयको दोस्रो मिनेटमा गगनदिपले अर्को गोल थपेका हुन् । तर चार मिनेटको फरकमा २ गोल फर्काउँदै खेलमा बराबरी गरेको थियो । लाजोङका लागि ड्यानियल ओडाफिन ६० औं, लरेन्स डिओले ६४ औं मिनेटमा गोल गरे ।

१३ खेलको समाप्तीमा मिनेर्भाको २९ अंक पुगेको छ । १ खेल बढी खेलेको निरोकाको २७ अंक छ र टोली दोस्रो स्थानमा झरेको छ । १० टोली रहेको आइ लिगमा लाजोङ १७ अंकसहित पाँचौं स्थानमा छ । मिनेर्भामा किरण आबद्ध भएयता टोलीको यो चौथो खेल हो ।

यसअघि तीनै खेलमा पोष्ट सम्हालेका किरण बुधबारको खेलमा वेन्चमै रहे । किरण सम्मिलित टोली शुक्रबारको पछिल्लो खेलमा चर्चिल ब्रदर्शसँग २–१ ले पराजित भएको थियो । किरणको डेब्यूमा निरोकालाई १–० ले हराएको मिनेर्भा त्यसपछिको खेलमा इष्ट बंगालसँग २–२ को बराबरीमा रोकिएको थियो ।