म्यानचेस्टर (एजेन्सी) – प्रिमियर लिग टोली म्यानचेस्टर सिटीका खेलाडिहरुमा अहिले थकावटको सङ्केत देखिन थालेको उसका स्टार मिडफिल्डर केभिन डे ब्रुयनले बताएका छन् ।

म्यानचेस्टर सिटी प्रिमियर लिगको शीर्षस्थानमा रहेको छ र च्याम्पियन्स लिग, एफए कप र लिग कप जित्ने सम्भावना पनि जीवतै छ । तर सिजनको सुरुवातमा देखिएको लयलाई अहिले निरन्तरता दिन नसक्नु खेलाडिहरुमा छाएको थकावट रहेको मिडफिल्डर केभिन डे ब्रुयनले बताएका छन् ।

सिटी यसै साता प्रिमियर लिगमा बर्नलीसँग १-१ को बराबरीमा रोकिएको थियो । खेलपछिको अन्तर्वार्तामा डे ब्रुयनले आफूले पहिलो मिनेटदेखि नै थकावट महसुस गरेको बताए ।

“पहिलो १० खेल निकै सहज महसुस भएको थियो । त्यसपछिको १० खेल अलि गाह्रो भयो भने अहिले निकै नै गाह्रो महसुस भइरहेको छ ,” डे ब्रुयनले इङ्लिस वेबसाइट फोफोटुलाई बताए ।

“सिजन अगाडि बढ्दै जादाँ हाम्रा केहि खेलाडिहरु घाइते हुँदै गए । अहिले हामीसँग सीमित खेलाडिहरु मात्र उपलब्ध छन् । हामीले निरन्तर खेलिरहँदा सो थकावट आजको हाम्रो प्रदर्शनमा पनि झल्कियो । यसले गर्दा राम्रो खेल्दा पनि हामी चाहेको नतिजा ल्याउन चुकिरहेका छौँ, ” डे ब्रुयनले थपे ।

हालै प्रशिक्षक पेप ग्वाडिओलाले पनि आफूसँग पर्याप्त खेलाडि नरहेकाले यो सिजन चारै उपाधि जित्न नसकिने बताएका थिए । सिटी अहिले तालिकामा प्रतिद्वन्दी म्यानचेस्टर युनाइटेडभन्दा १३ अंकले अगाडि रहेको छ । सिटी अब शनिबार लेस्टरसँग प्रिमियर लिगमा उत्रिनेछ ।