काठमाडौं (एजेन्सी) – अर्जेन्टिनाका दिग्गज फरवार्ड डिएगो म्याराडोनाले म्यानचेस्टर सिटी एवं अर्जेन्टिनी राष्ट्रिय फुटबल टोलीका स्ट्राइकर सर्जियो अगुएरोको फोटोमा कालोमोसो दलेका छन् । म्याराडोनाको निवासमा भएको एक तस्बिरमा उनले जानाजान अगुएरोको तस्बिरमा कालोमोसो लगाएका हुन् ।

म्याराडोनाको छोरीसँग ६ वर्षअघि अगुएरोले डिभोर्स गरेका थिए । सन् २००८ मा विवाह गरेको उक्त जोडीले सन् २०१२ मा छुट्टिने निर्णय लिए । तर म्याराडोनालाई भने यो सब पचिरहेको थिएन । उनले सार्वजनिक रुपमै पनि अगुएरोबारे नराम्रो प्रतिक्रिया दिंदै आएका छन् । अगुएरोको म्याराडोनाको छोरीसँग वैवाहिक सम्बन्धमा रहँदा एक छोरा पनि थिए ।

म्याराडोनाले ट्विटरमा राखेको एक तस्बिरमा अगुएरोको तस्बिर भएको स्थानमा कालोमोसो लगाएको प्रष्ट देखिन्छ । अगुएरोले उक्त तस्बिरमा आफ्नो छोरा बेन्जामिनलाई बोकेका छन् । एटलेटिको म्याड्रिडमा रहँदा लिइएको उक्त तस्बिरमा अगुएरो भएको भागमात्र कालोमोसो दलिएको छ ।

म्याराडोना हाल दुबईस्थित अल फुजरिया क्लबमा प्रशिक्षकका रुपमा कार्यरत छन् । एक समय अर्जेन्टिनाको राष्ट्रिय टोलीकै प्रशिक्षक रहिसकेका म्याराडोना विविध कारणले गर्दा समाचारमा आइरहन्छन् । अगुएरो भने तेस्रो पटक प्रिमियर लिग उपाधि जित्ने दाउमा छन् । उनले जारी सिजन प्रिमियर लिगमा १७ गोल गरिसकेका छन् ।