बागलुङ (हाम्रो खेलकुद) – बागलुङमा जारी प्रदेश नम्बर ४ स्तरीय मेयर कप फुटबलको उपाधिको लागि कास्कीको पोखरा लेखनाथ महानगरपालिका र स्याङजाको वालिङ नगरपालिका भिड्ने भएका छन् ।

शनिबार बागलुङ बजारको बाङ्गेचौर खेलमैदानमा भएका सेमिफाइनल खेलमा पोखरा लेखनाथ महानगरले गोरखा नगरपालिकालाई ८–१ को भारी गोलअन्तरले र वालिङ नगरपालिकाले तनहुँको व्यास नगरपालिकालाई १–० गोलअन्तरले पराजित गर्दै फाइनलमा प्रवेश गरेका हुन् ।

एक पक्षिय भएको पहिलो सेमिफाइनल खेलमा पोखरा लेखनाथले खेलको २५ औं मिनेटमा कप्तान उत्तम गुरुङको गोलबाट खाता खोलेको थियो । पोखरालाई भारी गोलअन्तरले विजयी गराउने क्रममा विजय श्रेष्ठले ह्याट्रिक गोल गरे । उनले खेलको ३३ औं, ४४ औं र ६० औं मिनेटमा गोल गर्दै ह्याट्रिक पुरा गरेका थिए ।

यस्तै पोखराको लागि खेलको ३९ औं र ४८ औं मिनेटमा भिषन गुरुङले गोल गरेका थिए भने खेलको ५५ औं मिनेटमा मैदान प्रवेश गरेका बालप्रसाद गुरुङले ७८ औं र खेलको अतिरिक्त समयको ९२ औं मिनेटमा गोल गरेका थिए । गोखराको लागि एक मात्र गोल खेलको ७९ औं मिनेटमा सुदिप बस्नेतले गोल गरेका थिए ।

यस्तै दोस्रो सेमिफाइनल खेलमा तनहुँको व्यास नगरपालिकालाई १–० गोलअन्तरले पराजित गर्दै स्याङजाको वालिङ नगरपालिका फाइनलमा प्रवेश गरेको हो । निकै प्रतिस्पर्धात्मक बनेको खेलको एक मात्र गोल वालिङका स्ट्राईकर सुरज हमाल ५५ औं मिनेटमा गोल गरेका थिए ।

निकै प्रतिस्पर्धात्मक बनेको खेलको पहिलो हाफमा दुवै पक्षबाट केही राम्रो प्रहारहरु विफल भएका थिए । खेलमा व्यासको २ प्रहार बारमा लागेको थियो । खेलको ६२ औं मिनेटमा व्यासका दिपेश आले मगरले प्रहार गरेको बल बारमा लागेर बाहिरिएको थियो भने ८० औं मिनेटमा पनि उनकै प्रहार बारमा लागेको थियो ।

खेलको ६९ औं मिनेटमा व्यासका स्ट्राईकर दिपेश आले मगरलाई वालिङका डिफेन्डर मंगल रानाले डिबक्समा फल गरेपछि पाएको पेनाल्टी विफल भएको थियो ।

व्यासका प्रेम आले मगरले प्रहार गरेको पेनाल्टी वालिङका गोलरक्षक राजा बाबु थापाले विफल पारिदिएका हुन् । बागलुङ नगरपालिकाको आयोजना तथा जिल्ला खेलकुद विकास समिति बागलुङ र जिल्ला फुटबल संघ बागलुङको व्यवस्थापनमा नकआउटका आधारमा संचालित प्रतियोगितामा प्रदेशका ११ नगरपालिकाको सहभागिता रहेको थियो । प्रतियोगिताको फाइनल खेल आईतबार हुनेछ ।

मेयर कपको विजेता टोलीले २ लाख २२ हजार २ सय २२ तथा दोस्रो हुने टोलीले १ लाख ११ हजार १ सय ११ रुपैयाँ प्राप्त गर्नेछ । प्रतियोगिताका सर्वोत्कृष्ट खेलाडीले १० तथा उत्कृष्ट गोलरक्षक, रक्षक, मिडफिल्डर, स्ट्राइकर र प्रशिक्षकले सम्मान ५ हजार रुपैयाँ प्राप्त गर्नेछन् ।