धरान (हाम्रो खेलकुद)– लक्ष्मी हुन्डाई मनाङ मस्र्याङ्दी क्लबले २० औं बुढासुब्बा रेडबुल गोल्डकप फुटबल प्रतियोगिताको शनिबार हुने उद्घाटन खेलमा सिएमजी क्लब संकटाको सामना गर्दैछ । मनाङ र संकटा पोखरामा जारी १६ औं आहा रारा गोल्डकप फुटबल प्रतियोगिता पहिलो खेलमै पराजित भएर धरान पुगेको थियो ।

संकटालाई नेपाल एपिएफ क्लबले १–० ले हराएको थियो भने आहा गोल्डकपको ५ पटकको विजेता मनाङ क्याराभान गोल्ड कपसहित अर्को ५ पटकको विजेता नेपाल पुलिस क्लबसँग ३–१ ले स्तब्ध भएको थियो । गत वर्ष नकआउटको सर्वाधिक उपाधि जितेको मनाङले यो वर्ष २ वटा उपाधि जितेको थियो भने ३ वटामा उपविजेतामा चित्त बुझाएको थियो ।

मनाङले चितवनमा जेसिज कप र गत महिना दुहवी गोल्डकप जितेको थियो । टोली झापाको सताक्षी गोल्डकप र मेची नेत्रालय काकरभिट्टा गोल्डकप तथा मदन भण्डारी स्मृति इटहरी गोल्डकपको फाइनलमा पराजित भएको थियो । सताक्षी र काकरभिट्टामा त्रिभुवन आर्मी क्लब र इटहरी कपमा रुस्लान थ्री स्टार क्लबसँग पराजित भएको थियो ।

८ टोलीको सहभागिता रहेको बुढासुब्बाको दोस्रो खेलमा आइतबार आयोजक धरान र भारतको दुर्गापुर स्टिलबीच हुनेछ । त्यस्तै सोमबार तेस्रो खेलमा नेपाल पुलिस र झापा ११ ले एकअर्काको सामाना गर्नेछन् । पुलिस शनिबार आहा गोल्डकपको फाइनल खेलेर धरान पुग्नेछ । त्यस्तै आहा गोल्डकपको फाइनल पुगेको अर्को टोली रुस्लान थ्री स्टार क्लबबीच माघ २३ गते हुनेछ ।

मनाङ र संकटाबीचको विजेताले झापा र पुलिसबीचको विजेतासँग माघ २४ गते पहिलो सेमिफाइनल खेल्नेछ । त्यस्तै धरान र दुर्गापुरबीचको विजेताले थ्री स्टार र सुदूरपश्चिम ११ बीचको विजेताको माघ २५ गते सामना गर्नेछ । फाइनल माघ २७ गते हुने आयोजक धरानले जनाएको छ ।