अर्जुन कार्की
बागलुङ (हाम्रो खेलकुद) – पर्वतको कुश्मा नगरपालिका बागलुङमा जारी प्रदेश नम्बर ४ स्तरीय प्रथम मेयर कप फुटबल प्रतियोगिताको क्वार्टरफाइनलमा पुगेको छ । बागलुङको भकुण्डे खेलमैदानमा बुधबार भएको खेलमा बागलुङको गल्कोट नगरपालिकालाई ३–१ ले हराउँदै कुश्मा अन्तिम आठमा पुगेको हो ।

१० औं मिनेटमा आशिष गुरुङले गोल गर्दै कुश्मालाई अग्रता दिलाए । तर त्यसको २ मिनेटपछि नै गल्कोटका लागि राहुल गौचनले बराबरी गोल फर्काए । कुश्माले खेलको २७ औं मिनेटमा सुदिप श्रेष्ठको गोलबाट पुन अग्रता लिएको थियो । उनले विपक्षी गोलकिपरबाट रिबाउन्डमा आएको बलमा गोल गरेका थिए । सन्तोष पुनले ४१ औं मिनेटमा अर्को गोल थपेपछि कुश्माको जित पक्का भएको थियो ।

नकआउटका आधारमा जारी प्रतियोगितामा प्रदेशका ११ नगरपालिकाको सहभागिता रहेको छ । प्रतियोगितामा बिहीबार तीन खेल हुने बताइएको छ । पहिलो खेल म्याग्दीको बेनी नगरपालिका र गैडाकोट नगरपालिका, देवचुली नगरपालिका र गोरखा नगरपालिकाबीच पहिलो चरणको खेल हुनेछ ।

त्यस्तै बागलुङ नगरपालिका र व्यास नगरपालिकाबीच क्वार्टरफाइनल हुने जिल्ला फुटबल संघ बागलुङका अध्यक्ष रामराज गुरुङले जानकारी दिए । मेयर कपको विजेता टोलीले २ लाख २२ हजार २ सय २२ तथा दोस्रो हुने टोलीले १ लाख ११ हजार १ सय ११ रुपैयाँ प्राप्त गर्नेछ । प्रतियोगिताका सर्वोत्कृष्ट खेलाडीले १० तथा उत्कृष्ट गोलरक्षक, रक्षक, मिडफिल्ड, स्ट्राइकर र प्रशिक्षकले सम्मान ५ हजार रुपैयाँ प्राप्त गर्नेछन् ।