दिपेन्द्र पोखरेल

पोखरा – लक्ष्मी हुन्डाई मनाङ मर्स्याङ्दी क्लब १६ औं आहा-रारा गोल्डकपको पहिलो खेलबाट बाहिरिएको छ । युवा खेलाडीले भरिएको नेपाल पुलिस क्लबसँग ३-१ ले पराजित मनाङ आफ्नो पहिलो खेलबाट बाहिरिएको हो । पुलिसले भने रमपम झापा-११ लाई पराजित गर्दै क्वाटर फाइनलमा स्थान बनाएको थियो ।

वोर्क परमिटको कारण विदेशी खेलाडी खेलाउन नपाएको मनाङ पुलिसविरुद्ध सेट देखिएन । पहिलो हाफमा दुवै टोलीले केहि अवसर सिर्जना गरेपनि गोल गर्न सकेनन ।

दोस्रो हाफमा निर कुमार राई, दिनेश राजबंशी र सुमन लामाको गोलमा पुलिसले ३-० को अग्रता लियो । मनाङलाई विशाल राईको एकमात्र गोल भने पर्याप्त भएन ।

खेलको ५३ औं मिनेटमा दाँयाबाट करिब २५ यार्डको गोलसंगै पुलिसलाई अग्रता दिलाएका निरले ५७ औं मिनेटमा उनको मद्दतले पुलिसलाई दोस्रो गोल दिलाए । निरको बाँया विङ्गको क्रसलाई दिनेशले हेड मार्फत गोल गरेका थिए । पुलिसले ७२ औं मिनेटमा सुमन लामाको गोलमा तेस्रो गोल गर्यो । गाडी बढेर पुलिसको काउन्टर एट्याक रोक्ने प्रयासमा रहेका मनाङको किपर दिनेश थापा मगरलाई बिट गर्दै सुमनले गोल गरे ।

मनाङ तीन गोलले पछि परे यता खेलमा दबाब राख्न सफल भयो । अनिलको पासमा विशालले ८२ औं मिनेटमा गोल गरेपनि मनाङलाई त्यो गोल पर्याप्त भएन ।

पुलिसले प्रतियोगिताको सेमिफाइनलमा धरानको सामना गर्नेछ । धरान यसअघि आर्मीलाई पराजित गर्दै सेमिफाइनलमा स्थान बनाउन सफल भएको हो ।

प्रतियोगिताको अहिलेसम्मको नतिजा र तालिका हेर्नुहोस