दिपेन्द्र पोखरेल

पोखरा – आहा रारा गोल्ड कप फुटबल प्रतियोगिताको १६ औं संस्करणको चौथो तथा अन्तिम क्वार्टरफाइनलमा घरेलु फुटबलका दुई सफल इतिहास बोकेका क्लबको प्रतिस्पर्धा हुँदैछ ।

आहा गोल्ड कप लगायत घरेलु फुटबलका लगभग सबै उपाधि जितेका दुई टोली लक्ष्मी हुन्डाई मनाङ मस्र्याङ्दी क्लब र नेपाल पुलिस क्लबले आज सेमिफाइनल प्रवेशका लागि एकअर्काको सामना गर्दैछन् ।

मनाङ सफल इतिहासको लागि निरन्तर प्रयासमा रहँदा पुलिस भने पहिलाको दाँजोमा कमजोर भएको छ । अघिल्लो वर्ष सर्वाधिक ४ नकआउट फुटबलको उपाधि जितेको मनाङ यो वर्ष पनि २ उपाधि जितिसकेको छ ।

तर, पुलिसको हकमा भने पछिल्ला केहि वर्ष उपाधिको खडेरी नै परे जस्तो भएको छ । यद्दपी युवा खेलाडी सम्मिलित पुलिसले राखेप च्याम्पियनसिप अन्तर्गत फुटबलमा स्वर्ण  जितेको पुलिसका प्रशिक्षक अनन्त थापा पनि यो खेलले अनुभवको खोजीमा रहेको युवा टोलीमा धेरै अर्थ रहेको बताउँछन् ।

‘हाम्रो टोलीमा अनुभवको कमि छ , त्यसैले पनि यो खेलले हाम्रा खेलाडीहरु लाई धेरै सिक्ने अवसर दिन्छ । युवा टोलीलाई ठूलो खेलको अनुभव पाउने यो राम्रो मौका हो ,’ थापाले हाम्रो खेलकुद डटकम लाई भने , ‘हाम्रा खेलाडी सकारात्मक छन् । हामी जित्न हरसम्भव प्रयास गर्नेछौं । हामीले धेरै मेहेनत गर्दै खेलको योजना बनाएका छौं । हाम्रा खेलाडीले आफ्नो भूमिका बुझेका छन् । त्यसैले हामी जित्ने क्षमता राख्छौ ।’

पुलिसले प्रतियोगिताको पहिलो खेलमा झापालाई १–० ले हराएको थियो । मनाङको भने प्रतियोगितामा पहिलो खेल हो । इटहरीको फाइनलमा रुस्लान थ्री स्टार क्लबसँग पराजित भएको मनाङको टोलीमा दुइ विदेशी खेलाडी आजको खेलमा खेल्न नपाउने प्रशिक्षक छिरिङ लोप्साङले बताए । ‘वोर्क पर्मिटका कारणले हाम्रा दुई विदेशी खेलाडी खेल्न पाउने छैनन् , उनले भने , इटहरीमा खेलेका अन्य सबै खेलाडी राम्रो लयमा छन् ।’

आजको विजेताले सेमिफाइनलमा धरान फुटबल क्लबको सामना गर्नेछ । धरानले यसअघि नेपाल आमर्मीलाई टाइब्रेकरमा पराजित गर्दै अन्तिम चारमा पुगेको थियो ।