पोखरा ( हाम्रो खेलकुद)-  त्रिभुवन अार्मी क्लब टाइब्रेकरमा धरान फुटबल क्लबसँग ५-४ पराजित हुँदै अाहा! रारा गोल्डकप फुटबल प्रतियोगिताको क्वाटरफाइनलबाट बाहिरिएको छ ।

निर्धारित समय १-१ को बराबरीमा सकिएपछि खेलको नतिजा टाइब्रेकरबाट लिनुपरेको थियो । पहिलो हाफमा पुरै समय विपीलाई दबाबमा राखेको अार्मीले खेलको १८ अौं मिनेटमा अग्रता लिएको थियो । अार्मीका लागि एरिक विष्टको पासमा कप्तान भरत खवासले गोल गरे ।

१९ अौं मिनेटमा टंक बस्नेतको क्रसमा प्रिन्स जर्ज कार्कीले गोल गर्न सकेनन् भने ४५ अौं मिनेटमा नवयुग अग्रता दोब्बर गर्न चुके । ६३ अौं मिनेटमा धरानका निशान लिम्बूले बराबरी गोल फर्काए ।

८८ अौं मिनेटमा नवयुगको हेडर भरतको क्रसमा पोस्टमा छिरेपनि रेफ्रिले त्यसलाई अफसाइड दिए । त्यसपछि १०/१० मिनेट थप गरिएपनि दुवैले गोल गर्न सकेनन् ।

टाइब्रेकरमा अार्मीका भरत खवास मैदानबाट बाहिरिएपछि कप्तानीको जिम्मेवारी पाएका जर्ज प्रिन्स चुक्दा अार्मी पराजित हुन पुग्यो । जर्ज प्रिन्स कार्कीको प्रहार क्रसबारमा लागेर बाहिरिनु नै आर्मीको हारको कारण बन्यो । जर्ज प्रिन्स बाहेक आर्मीका नवयुग श्रेष्ठ , दीपक गुरुङ , दीप लामा र विवेक बस्नेतले गोल गरे । त्यस्तै धरानका कप्तान विष्णु सुनार , निशान लिम्बु , बुद्धीमान राई , रोमन लिम्बु र सुरज बिकले गोल गरे ।

पेनाल्टीको  भिडियो हेर्नुहोस 

खेलको म्यान अफ दि म्याच निशान लिम्बू भए । यसअघि मदन भण्डारी गोल्डकपमा पनि अार्मी थ्रीस्टारसँग पेनाल्टीमा पराजित भएको थियो ।

प्रतियोगिताको खेल तालिका र अहिलेसम्मको नतिजा हेर्नुहोस । 

बेलुकी ६:३७ मा सच्याइएको