पोखरा (हाम्रो खेलकुद) – रमपम झापा ११ लाई १-० ले हराउँदै नेपाल पुलिस क्लब १६ औं आहा-रारा गोल्ड कपको अन्तिम ८ मा स्थान बनाउन सफल भएको छ । पोखरा रंगशालामा सम्पन्न अन्तिम प्रि-क्वाटर फाइनल खेलमा सुमन लामाको एकमात्र गोलमा पुलिसले जित निकाल्यो । पुलिसले क्वाटर फाइनलमा मनाङको सामना गर्नेछ । 

खेलको ८ औं मिनेटमा राम्रो मौका पाएका सुमनको प्रहार सोझै किपरको हातमा पुगे पनि उनले १३ औं मिनेटमा भने राम्रो गोल गर्दै पुलिसलाई दिलाएको अग्रता टोलीले खेलको अन्तिम समय सम्म जोगाउन सफल भयो ।

झापाले २८ औं मिनेटमा लगातार ३ कर्नर पाएपनि त्यसलाई सदुपयोग भने गर्न सकेन । भोला सिलवाल र जुमानु राईलाई बेञ्चमा राखेको पुलिसले युवा खेलाडीका साथमा बलियो देखियो । पुलिसले २९ औं मिनेटमा अग्रता दोब्बर गर्ने अवसर पाए पनि अन्मार्कड रवी पासवानको प्रहार झापाका किपर किशोर गिरीले बचाए ।

दोस्रो हाफमा झापाले पोसेसन राखे पनि गोल गर्ने राम्रो अवसर भने सिर्जना गर्न सकेन । पुलिसले दोस्रो हाफमा गोल गर्ने राम्रो अवसरहरु गुमायो । रवी पासवानले ५६ औं मिनेटमा गरेको क्रसमा अविशेक रिजालको हेडर बाहिरिएपछि पुलिसले अग्रता दोब्बर गर्ने अवसर गुमाएको थियो ।

त्यस्तै पुलिसका सन्तोस हेमारुनले ७५ औं मिनेटमा तेज तामांगलाई बक्स भित्र पास मिलाए पनि तेजले ६ यार्ड भित्रबाट बल कनेक्ट गर्न सकेनन् । झापाले मिडफिल्डमा पकड जमाएपनि झापाका स्ट्राइकरहरु चलन सकेनन् । झापाका स्ट्राइकर विशाल राई यस प्रतियोगितामा सहभागी भएनन् ।

प्रतियोगिता अन्तर्गत भोली पहिलो क्वाटर फाइनलमा बंगलादेशको उत्तर बरिनधारा र सुदुरपश्चिम भिड्ने छन् ।