पोखरा (हाम्रो खेलकुद) – पोखरामा जारी १६ औं आहा रारा गोल्ड कपको चौथो खेलमा नेपाल पुलिस क्लबले रमपम झापा ११ को सामना गर्दै छ ।

अघिल्लो साता दाङ्गमा सम्पन्न राखेप च्याम्पियनसिप अन्तर्गत फुटबलमा उपाधि जितेको पुलिसले झापासँगको खेलबाट प्रतियोगितामा सुरुआत गर्दैछ । उक्त प्रतियोगिताले खेलाडीको मनोबल बढेकाले पोखरामा राम्रो प्रदर्शन गर्नेमा पुलिसका प्रशिक्षक अनन्त थापा आशावादी छन् । ‘दाङ्गमा उपाधि जितेकाले टोलीको मनोबल उच्च छ , त्यसैले हामीले राम्रो खेल्नेमा आशावादी छु’ , उनले भने ।

त्यस्तै युवा खेलाडीहरुलाई अनुभव दिँदै भविष्यका लागि टोली तयार गर्ने लक्ष्य लिएर अघि बढ्दै गरेको प्रशिक्षक थापाले बताए । ‘भविष्यको लागि टोली तयार गर्ने लक्ष्य सहित हामी अघि बढ्दै छौं । त्यस्तै पुलिसको टोलीमा नँया खेलाडीलाई मौका दिँदै छौं,’ थापाले भने ।

उपाधि जित्ने लक्ष्य बोकेर अघि बढेको पुलिसको टोलीमा इन्जुरीको कुनै समस्या नरहेको र गत साता च्याम्पियन बन्दाका सबै खेलाडी टोलीमा उपलब्ध रहेको थापाले हाम्रो खेलकुद डट कमलाई जानकारी दिए । लामो समय देखि घुडाँको चोटका कारण बाहिरिएका रविन श्रेष्ठ भने अझै मैदानमा फर्किएका छैनन् ।

झापाको टोलीमा भने स्टार स्ट्राइकर विशाल राई यस प्रतियोगितामा उपलब्ध नहुने प्रशिक्षक प्रवेश कटुवालले जानकारी दिए । टोलीमा सिनियर खेलाडीको कमि रहेपनि पुलिससँग बिगतको नतिजा आफ्नो पक्ष्यमा रहेकोले यो खेलमा जित्ने लक्ष्य रहेको उनले जनाए । ‘पुलिस सँग बिगतको खेलहरुमा नतिजा हाम्रो पक्ष्यमा छ । अहिले टोलीमा सिनियर खेलाडी धेरै छैनन् त्यसैले हामीलाई यो खेल गाह्रो हुन सक्छ तर हामी जितका लागि खेल्नेछौं ‘ , प्रशिक्षक कटुवालले जनाए ।

गत मंगसिरमा सम्पन्न सताक्षी गोल्ड कपको सेमिफाइनलमा आर्मीसँग पराजित झापा त्यसपछिको तीन प्रतियोगिताको पहिलो खेलबाट बाहिरेको छ । दुहवी गोल्ड कपमा चर्च ब्वाइजसँग पराजित भएको झापा धनगढीमा सम्पन्न खप्तड गोल्ड कपमा थ्री स्टारसँग र इटहरी गोल्ड कपमा मनाङसँग पराजित भएको थियो ।

प्रतियोगिताको खेल तालिका र अहिलेसम्मको नतिजा हेर्नुहोस  (समयसहित)