इटहरी (हाम्रो खेलकुद) – जापानबाट फर्केको केहि दिनमै घरेलु मैदानमा ओर्लेका पूर्व राष्ट्रिय खेलाडी सन्तोष साहुखलको प्रभावशाली प्रदर्शनबाट प्रेरित लक्ष्मी हुन्डाई मनाङ मस्र्याङ्दी मदन भण्डारी स्मृति इटहरी गोल्ड कपको फाइनलमा पुगेको छ । भारतीय क्लब गरिफा स्पोर्टिङलाई ३–० ले हराउँदै मनाङ उपाधि नजिक पुगेको हो । 

शनिबार हुने फाइनलमा मनाङ ले रुस्लान थ्री स्टार क्लब को सामना गर्नेछ । त्रिभुवन आर्मी क्लबलाई पेनाल्टीमा हराउँदै थ्री स्टार बुधबार फाइनलमा पुगेको थियो । पहिलो हाफ गोलरहित भए पनि मनाङले दोस्रो हाफमा तीन गोल थपेको थियो ।

खेलको ४४ औं मिनेटमा गरिफाका अबु बोकाईले रातो कार्ड पाउँदै मैदान छोडेपछि मनाङले त्यसको फाइदा उठाएको हो । केहि दिन अघिमा जापानबाट फर्केर इटहरी पुगेका सन्तोषले ४७ औं मिनेटमा गोल गर्दै खाता खोलेका थिए ।

थ्री स्टारका पूर्व स्टार समेत रहेका सन्तोषले ६९ औं मिनेटमा अर्को गोल गर्दै अग्रता दोब्बर पारे । विमल रानाले खेलको ७६ औं मिनेटमा गोल गर्दै टोलीको जित सुनिश्चित गरेका थिए । सन्तोष खेलको म्यान अफ द म्याच चुनिए । उनले ट्रफी सहित नगद १० हजार प्राप्त गरे ।

यो वर्ष दुई नकआउट उपाधि जितेको मनाङको यो पाँचौं फाइनल हो । चितवनमा जेसिस कप जितेको मनाङले दुवही गोल्ड कपको उपाधि उचालेको थियो । टोली सताक्षी गोल्डकप र मेची नेत्रालय काकरभिट्टा गोल्डकप दुवैको फाइनलमा आर्मीसँग पराजित भएको थियो । यो महिनाको सुरुआतमा धनगढीमा सम्पन्न नेपाल आइस सुदूरपश्चिम खप्तड गोल्ड कपको सेमिफाइनलमा पनि मनाङ आर्मीसँगै पराजित भएको थियो ।