दिपेन्द्र पोखरेल

पोखरा – नेपाल एपिएफ क्लबले १६ औं आहा रारा गोल्ड कप फुटबल प्रतियोगितामा आज हुने तेस्रो खेलमा सिएमजी क्लब संकटाको सामना गर्दै छ । माघ १ गते धनगढीमा नेपाल आइस सदूरपश्चिम खप्तड गोल्डकप फुटबल प्रतियोगिताको फाइनल खेलेको एपिएफले त्यसअघि संकटालाई हराएको थियो । संकटा यसपटक एपिएफमाथि जित्न हरसम्भव प्रयास गर्ने तयारीमा छ ।

खप्तड गोल्डकपको फाइनलमा त्रिभुवन आर्मी क्लबसँग पराजित एपिएफ मदन भण्डारी इटहरी गोल्ड कपको पहिलो खेलमा रुस्लान थ्री स्टारसँग पराजित भएको थियो । संकटा भने खप्तड पछि पहिलो पटक मैदानमा उत्रदैछ । गत वर्ष ३ वटा नकआउट उपाधि जितेको संकटा थ्री स्टारले घरेलु फुटबलमा पुनरागमन गरेपछि भने केही कमजोर भएको छ । थ्री स्टारले गत वर्ष घरेलु फुटबल नखेल्दा त्यसका केहि महत्वपूर्ण खेलाडी संकटाबाट खेलेका थिए ।

संकटा प्रशिक्षक सल्यान खड्गी अघिल्लो भेटमा पराजित भएपनि त्यसको मनोबैज्ञानिक फाइदा अहिले एपिएफलाई नहुने बताउछन् । ‘त्यो खेल इतिहास हो । इतिहासका अन्य खेलमा हामीले पनि एपिएफलाई थुप्रै पटक हराएका छौं । त्यसैले त्यसले आजको खेलमा हामीलाई कुनै असर पार्दैन ‘, खड्गीले भने, ‘मोफसलमा आफ्नो खेलाडीहरुको व्यस्तताका कारण राम्रोसँग तयारी गर्न नपाएपनि सोचे भन्दा टोली बलियो छ ।’

एपिएफ भने तुलनात्मक रुपमा बलियो देखिन्छ । राष्ट्रिय टोलीका नियमित सदस्य अन्जन बिष्ट राम्रो लयमा छन् । खप्तड गोल्ड कपको फाइनल अघि नै ३ गोल गरेका उनी प्रतियोगिताका सर्वाधिक गोलकर्ता समेन बनेका थिए । अन्जनकै दाजु रन्जन बिष्ट र युवराज खड्का पनि टोलीका महत्वपूर्ण सदस्य हुन् । पहिलो रोजाइमा पर्न प्रतिस्पर्धा रहेको अर्थमा पनि एपिएफको बेन्च संकटाको तुलनामा बलियो मान्न सकिन्छ ।

एपिएफका प्रशिक्षक रत्नकाजी महर्जन धनगढीको प्रदर्शनले टोलीमा सकारात्मक उर्जा रहेको बताउँछन् ।’धनगढीमा राम्रो प्रदर्शन गर्दै फाइनल पुगेकोले टोलीमा सकारात्मक उर्जा छ । तर छोटो समयमा तीन ठाँउमा खेल्दा टोली व्यस्त रह्यो । जसका कारण खेलाडीमा फिटनेसको समस्या छ’, उनले भने, ‘राजु नगरकोटी र रमेश दंगाललाई सन्चो छैन , श्याम नेपाली पनि पुरै फिट छैनन् ।’

 प्रतियोगिताको खेल तालिका र अहिलेसम्मको नतिजा यँहा हेर्नुहोस ।