युनाइटेड (एजेन्सी)– सान्चेजले नयाँ क्लब म्यानचेस्टर युनाइटेडका अन्य खेलाडीसँग पहिलो पटक मंगलबार अभ्यास गरेका छन् । सान्चेजले नयाँ टोलीका खेलाडीका बारेमा सकारात्मक प्रक्रिया पनि दिएका छन् । चिलियन स्टारले युनाइटेडका नम्बर एक गोलकिपर डेभिड डि गेयाबाट आफु प्रभावित रहेको बताए ।

यसअघि विरुद्धमा खेलेका स्पेनिस गोलकिपरसँग अहिले एउटै टोलीबाट खेल्न पाउँदा पनि उनले खुसी व्यक्त गरेका छन् । ‘मैले यहाँका खेलाडीलाई व्यक्तिगत रुपमा जान्ने वा समय बिताउने अवसर पाएको थिइन ,’ सान्चेजले भने, ‘यद्दपी मैले खाली उनीहरुविरुद्ध खेलेको हिसाबले मात्र बुझेको थिए ।’

उनले अगाडि थपे, ‘डेभिड डि गेया अहिले विश्वका उत्कृष्ट गोलकिपर मध्येका एक हुन् । उनी त्यस्तो खेलाडी हुन् जो विरुद्ध गोल गर्न सधै कठिन हुने गर्दछ । त्यसैले उनी मेरा लागि विश्वका उत्कृष्ट गोलपिकर हुन् ।’ जोसे मौरिन्होको टोलीबाट सान्चेजले शुक्रबार डेब्यू गर्ने सम्भावना रहेको छ ।

युनाइटेडले शुक्रबार एफए कपको चौथो चरणमा योभिलसँग प्रतिस्पर्धा गर्दैछ । यद्दपी उनले शुक्रबार पहिलो रोजाइमा खेल्ने सम्भावना कम छ । तर पनि उनले वैकल्पिक खेलाडीका रुपमा मैदान प्रवेश गरेर युनाइटेडबाट डेब्यू खेलमै गोल गर्ने अपेक्षा गरिएको छ ।