काठमाडौं (हाम्रो खेलकुद) – मदन भण्डारी गोल्डकप २०७४ अन्तर्गत पहिल्लो सेमिफाइनल खेलमा बुधबार त्रिभुवन आर्मी क्लब र थ्रीस्टार क्लब भिड्दैछन् । आर्मीले क्वाटरफाइनलमा भुटानको ड्रुक फुटबल क्लबलाई ५-० को फरकिलो अन्तरले पराजित गर्दै सेमिफाइनलमा स्थान बनाएको हो ।

केही दिनअघि सुदूरपश्चिम गोल्डकपको उपाधि जित्ने क्रममा आर्मीले उक्त प्रतियोगिताको क्वाटरफाइनलमा थ्रीस्टारलाई पराजित गरेको थियो । आर्मीका प्रशिक्षक नविन न्यौपाने टोली निकै राम्रो लयमा रहेकै कारण यस प्रतियोगितामा पनि राम्रो नतिजा ल्याउने प्रयासमा छन् । ‘हामीले थ्रीस्टारलाई सुदूरमा पनि राम्रो खेलेर जित्यौं । टोलीमा चोटको कुनै समस्या छैन । लगातार जितको कारण टोलीको मनोबल उच्च रहेको छ,’ उनले भने । प्रशिक्षक नविनले थ्रीस्टार पछिल्लो खेलको बदला लिने सुरमा भएकाले पनि खेल अझै महत्वपूर्ण र प्रतिस्पर्धात्मक रहने बताए ।

नविन न्यौपानेको आगमनसँगै आर्मीले घरेलु प्रतियोगितामा वर्चस्व कायम गरको छ । आर्मीले जारी सिजनमा ४ प्रतियोगितामाथि कब्जा जमाइसकेको छ । विरगंजको विशाल स्मृति गोल्डकपबाट सुरु भएको विजय यात्रा गत महिना झापामा सताक्षी गोल्डकप र मेची नेत्रालयल काँकडभित्ता गोल्ड कपसँगै निरन्तरता पाएको थियो । गत साताको खप्तड गोल्डकप आर्मीको चौथो उपाधि हो ।