म्याड्रिड (एजेन्सी)– स्पेनिस क्लब रियल म्याड्रिड टोटेनह्यामका स्टार ह्यारी केनलाई विश्व कीर्तिमानी रकममा भित्राउने योजनामा रहेको सञ्चारमाध्यमहरुले उल्लेख गरेका छन् । रसिया विश्व कप अघि नै सम्झौता गर्ने गरि रियलले २ सय मिलियन पाउन्डको प्रस्ताव गर्ने सम्भावना रहेको बताइएको छ ।

स्पेनिश साविक विजेता रियल जारी सिजनमा लिगको चौथो स्थानमा रहेको छ । टोलीका तीन फरवार्ड क्रिस्टियानो रोनाल्डो, गेराथ बेल र करिम बेन्जिमाले यो सिजन मात्र १४ गोल गरेका छन् । अर्को तिर केन एक्लैले यो सिजन २० गोल गरिसकेका छन् । केन युरोपका शीर्ष ५ लिगमध्ये गत सिजन सर्वाधिक गोल गर्ने खेलाडी हुन् । उनले सन् २०१७ मा ५६ गोल गरेका थिए । जबकी बार्सिलोनाका लियोनल मेस्सीले ५४ र रोनाल्डोले ५३ गोल गरेका थिए ।

हालैको एक अन्तरवार्तामा केनको भविष्यलाई लिएर टोटेनह्यामका प्रशिक्षक पोचिन्टिहोले भनेका थिए, ‘ म चाहन्छु केन यहि खेलुन् । उनी उत्कृष्ट मध्येका एक हुन् । तर, हामीले कुनै पनि खेलाडीलाई रोक्न बाध्य गर्न सक्दैनौं । ‘ टोटेनह्यमका अध्यक्ष डानिल लिभे भने आफ्ना स्टार खेलाडी बेच्ने पक्षमा छैनन् । उनले भने, ‘हामी उनलाई विक्री गर्न चाहन्नौं । मलाई विश्वास छ उनी अर्को सिजनमा पनि यहि हुनेछन् । ‘

रियलले देखाएको चासो प्रति संकेत गर्दै केनले भनेका छन्, ‘मैले सधै भन्ने गरेको छु, म राम्रो गर्ने प्रयासमा छु र बढी भन्दा बढी राम्रो गर्ने कोशिसमा छु । हामी उपाधि जित्न चाहन्छौं । त्यो हाम्रो लक्ष्य हो । क्लब त्यसैतर्फ अघि बढिरहेको छ । म यहाँ खुसी छु ।’

भविष्यमा जे भएपनि अहिले केन क्लब समर्थकका प्रिय खेलाडी हुन् । क्लबको प्रदर्शन यो सिजन कमजोर भएकै कारण रियलले नयाँ खेलाडी भित्राउने अनुमानमा केन पनि समेटिएका हुन् ।