लण्डन (एजेन्सी) – पछिल्लो दश वर्षमा उत्कृष्ट खेलाडिले पाउने बलोन डि’ओरमा अर्जेन्टिनाका लियोनल मेस्सी र पोर्चुगलका क्रिस्टियानो रोनाल्डोकै दबदबा कायम छ । तर अबको केहि वर्षमा भने सो उपाधि जित्नेमा नयाँ खेलाडिको नाम आउने सम्भावना पनि उत्तिकै छ । त्यस्ता ३ खेलाडिहरुको सुची यस प्रकारको रहेको छ:

३. किलियन बाप्पे

फ्रान्सका बाप्पे अहिलेको उत्कृष्ट युवा खेलाडि हुन् । १९ वर्षको उमेरमै गत साल बलोन डि’ओरको सुचीमा उनी सातौं स्थानमा थिए । यस सिजन पनि उनको प्रदर्शन निकै राम्रो रहेको छ । यस सिजन उनले २८ खेलमा १५ गोल र ११ असिस्ट गरिसकेका छन् । बाप्पे आफैं भने बलोन डि’ओर जित्न आफूले अझै धेरै सिक्नु बाकिं रहेको बताउँछन् ।

२. ह्यारी केन

२०१७ मा ह्यारी केनले सबै प्रतियोगितामा ५६ गोल गरे । जुन मेस्सी र रोनाल्डो भन्दा पनि धेरै हो । प्रिमियर लिगमा केहि सिजनदेखि उनी निकै उच्च लयमा छन् । यस वर्षको विश्वकपमा उनले इङ्ग्ल्यान्डको अग्रपंक्तिको जिम्मेवारी लिने पक्का नै छ । केनले आफ्नो गोलको लयलाई लिगमा निरन्तरता दिँदै विश्वकपमा पनि उत्कृष्ट प्रदर्शन गरे बलोन डि’ओरमा उनको दाबेदारी पक्कै पनि बलियो हुनेछ ।

१. नेयमार

बार्सिलोनाबाट यस सिजन पिएसजी गएयता नेयमारको उत्कृष्ट लय कायम छ । २३ खेल खेल्दै उनले २४ गोल तथा १४ असिस्ट गरिसकेका छन् । नेयमारले रुस विश्वकपमा ब्राजिलको प्रतिनिधित्व गर्दै उपाधि दिलाउन सके १० वर्षमा पहिलो पटक बलोन डि’ओर मेस्सी र रोनाल्डो बाहेकको खेलाडिलाई जाने सम्भावना बढी हुने छ ।