लमजुङ (हाम्रो खेलकुद) – ललितपुरको नख्खिपोट युवा क्लब आठौं संस्करणको पारेदेवी नकआउट फुटबल प्रतियोगिताको च्याम्पियन बनेको छ । लमजुङको दोर्दी गाउँपालिका दुबारगाउँमा भएको फाइनल खेलमा सेभेन लक्की युवा क्लब हिलेलाई १–० ले पराजत गर्दै नख्खिपोट च्याम्पियन बनेको हो ।

प्रतिस्पर्धात्मक बनेको खेलको अन्तिम समयमा सौरभ मगरले गरेको गोल नै नख्खिपोटलाई च्याम्पियन बन्न पर्याप्त बन्यो । उपाधिसहित नख्खिपोटले नगद १ लाख रुपैया प्राप्त गर्यो । दोस्रो भएको सेभेन लक्कीले नगद ५० हजार रुपैयामा चित्त बुझायो । सेमिफाइनलसम्म पुगेका बीवाइसी भोटेओडार र घनपोखरा युवा क्लव घनपोखराले समान १५/१५ हजार रुपैयाँ प्राप्त गरे । सर्वाधिक गोलकर्ता सेभेन लक्कीका लिलजंग तामाङले ७ गोल गर्दै नगद ६ हजार र ट्रफि पाए । उत्कृष्ट खेलाडी नख्खिपोटका सविन खड्काले नगद ६ हजार पाए ।

बिजयीलाई निवर्तमान सांसद जमिन्द्रमान घले, आयोजक पारेदेवी युवा क्लवका अध्यक्ष ओमलाल गुरुङ लगायतले पुरस्कृत गरे । १ माघ बाट सुरु भएको प्रतियोगितामा १४ टिमले सहभागिता रहेको थियो । त्यस्तै, महिलातर्फ आयोजक पारेदेवी युवा क्वल च्याम्पियन बनेको छ । फाइनलमा आयोजकले सेभेन लक्की हिलेबजारलाई टाइब्रेकरमा ३–१ ले हराउदै विजयी हासिल गर्न सफल भयो । निर्धारित समयमा १–१ गोल भएको थियो । उपाधिसहित पारेदेवीले २० हजार र दोस्रो भएको सेभेन लक्कीले १० हजार पाए ।