काठमाडौं (हाम्रो खेलकुद) – फिफा वरियतामा नेपाल ६ स्थान माथि उक्लिएको छ । विश्व फुटबलको सर्वाेच्च निकाय फिफाले बिहिबार जारी गरेको नयाँ वरियता अनुसार नेपालले ६ स्थान सुधार गर्दै १ सय ६५ औं स्थानमा उक्लिएको हो ।

अघिल्लो महिना नेपाल १ सय ७१ औं स्थानमा रहेको थियो । दक्षिण एसियामा भने नेपाल चौथो स्थानमा यथावत छ । दक्षिण एसियामा भारत, अफगानिस्तान, माल्दिभ्स शीर्ष तीनमा रहेका छन् । भुटान, बंगलादेश, श्रीलंका र पाकिस्तान क्रमश पाँचौं देखि आठौं स्थानसम्म छन् ।

छिमेकी मुलुक भारत तीन स्थान सुधार गर्दै १ सय २ औं स्थानमा पुगेको छ । अफगानिस्तान १४८ औं स्थानमा यथावत रहँदै दक्षिण एसियामा दोस्रो स्थानमा यथावत छ । पाँच स्थान सुधार गर्दै माल्दिभ्स १ सय ५० औं स्थानमा रहेको छ । भुटान १ सय ८८ औं स्थानमा, बंगलादेश १ सय ९७ औं स्थान, श्रीलंका २ सयौ स्थान र पाकिस्तान २ सय १ औं स्थानमा यथावत छन् ।

विश्व वरियतामा शीर्ष १४ सम्म कुनै परिवर्तन भएको छैन । शीर्ष वरियतामा विश्वविजेता जर्मनी रहेका छ । ब्राजिल, पोर्चुगल, अर्जेन्टिना, बेल्जियम, स्पेन, पोल्याण्ड, स्वीट्जरल्याण्ड, फ्रान्स र चिली शीर्ष १० स्थानमा रहेका छन् । पेरु, डेनमार्क, कोलम्विया र इटाली ११ देखि १४ औं स्थानमा यथावत रहेका छन् ।