म्याड्रिड (एजेन्सी) – ला लिगामा खराब लयमा रहेको रियल म्याड्रिडले जनवरी ट्रान्सफर विन्डोमा आफ्नो टोली बलियो बनाउने मौका खोजिरहेको छ । त्यस्तैमा रियलले इटालियन क्लब इन्टर मिलनको स्ट्राइकर प्रति गम्भीर चासो व्यक्त गरेको छ ।

रियलले भित्राउन खोजेको स्ट्राइकर मौरो इकार्डि हुन् । स्पेनिश साविक विजेताले इकार्डिको ९७ मिलियन पाउन्डको रिलिज क्लजअनुसार उनीलाई रियलमा ल्याउन खोजिरहेको छ । तर सो ट्रान्सफर यो विन्डोमा सम्भव नहुने र रियलले सिजनको अन्त्य नै कुर्न पर्ने जनाइएको छ ।

यस सिजन क्रिस्टियानो रोनाल्डो, ग्यारेथ बेल र करिम बेन्जेमासम्मिलित अग्रपंक्तिले त्यति गोल गर्न नसक्दा रियल नयाँ अनुहार समावेश गर्न खोजिरहेको छ । रियलले इकार्डिलाई यहि जनवरीमा भित्राउँदै आफूलाई अझ बलियो बनाउन खोजेको बुझ्न सकिन्छ । तर इकार्डिको रिलिज क्लज सिजन सकिएपछि मात्र लागु हुने भएकोले उनलाई भित्राउन रियलले केहि समय प्रतिक्षा गर्नु पर्ने हुन्छ ।

रिलिज क्लज अनुसार ९७ मिलियन पाउन्ड नै दिन तयार रहे इन्टरले पनि केहि रोक लगाउन मिल्दैन । इकार्डि यस सिजन राम्रो लयमा रहेका छन् । सबै प्रतियोगितामा उनले १८ गोल गरिसकेका छन् । तर अर्जेन्टिनाका इकार्डिले विश्वकपमा राम्रो प्रदर्शन गरे अन्य क्लब पनि उनलाई भित्राउन खोज्ने भने पक्का छ ।

यस सिजनको अन्त्यपछि रियल ट्रान्सफर मार्केटमा निकै व्यस्त हुने पक्का छ । अग्रपंक्तिमा हाल रियल नेयमारप्रति पनि इच्छुक रहेको छ । त्यस्तै इङ्ग्लिस क्लब टोटनह्याम हटस्परका स्ट्राइकर ह्यारी केनप्रति पनि रियलको कडा नजर रहेको छ ।