काठमाडौं – साफ च्याम्पियनसिपको लज्जास्पद हारको साता दिन नवित्दै राष्ट्रिय फुटबल टोलीका प्रशिक्षक प्याट्रिक अजेम्सले सम्झौता नविकरण नगर्ने भएका छन् ।

राष्ट्रिय टोलीसँगै सोमबार नेपाल फर्केलगत्तै घरायसी कारण देखाउँदै त्यसै रात फ्रान्स गएका अजेम्सले ट्वीटरमार्फत सम्झौता नविकरण नगर्ने उल्लेख गरेका हुन् । जनवरी ५ मा नेपाल फर्कने भन्दै फ्रान्स गएका अजेम्सले काम नगर्ने छनक देखेरै एन्फाले जनवरी ८ देखि बंगलादेशमा हुने बंगबन्धु कपको प्रशिक्षणको जिम्मा बालगोपाल महर्जन र उपेन्द्रमान सिंहलाई दिइसकेको छ ।
एन्फासँग उनको सम्झौता अझै दुई महिना (फेब्रुअरी २०१६ ) सम्म बाँकी नै छ । ‘नेपाली फुटबल विकासलाई दिएको योजनामा एन्फाको कुनै प्रतिक्रिया आएन,’अजेम्सले शनिबार दिउँसो ट्वीट गरेका छन्,‘त्यसैले म सम्झौता नविकरण गर्नेछैन ।’ एन्फा श्रोतका अनुसार साफ च्याम्प्यिनसिपको तयारीका लागि वैदेशिक प्रशिक्षण र कम्तिमा दुई मैत्रीपूर्ण खेल आवश्यक रहेको अजेम्सले मौखिक योजना दिएका थिए । त्यो पनि पुरा गर्न एन्फा असमर्थक रहेको थियो । विगतमा एन्फाले साफ च्याम्पियनसिपका लागि महिनौ लामो प्रशिक्षण र वैदेशिक प्रशिक्षणका सँगै मैत्रीपूर्ण खेलको पनि व्यवस्थापन गर्ने गथ्र्यो ।
४ महिनाअघि मासिक ७ हजार अमेरिकी डलरमा राष्ट्रिय टोलीको बागडोर सम्हालेका बेल्जियन अजेम्सको नेतृत्वमा नेपालले एक मैत्रीपूर्णसहित ३ खेल खेल्यो, तर कुनै पनि पनि सफलता हात पार्न सकेन । साफ च्याम्प्यिनसिपको समूह चरणमा श्रीलंकासँग १–० र आयोजक भारतसँग ४–१ ले पराजित हुँदै नेपाली टोली समूह चरणबाट बाहिरिएको थियो । साफको तयारीका लागि टोलीले बंगलादेश फुटबल टोलीसँग ढाकामा अभ्यास खेल खेलेको थियो । जसमा नेपाल १–० ले पराजित भएको थियो ।
साफ च्याम्पियनसिपको फाइनलमा आइतबार भारत र अफगानिस्तानबीच प्रतिस्पर्धा हुँदैछ ।