धनगढी (हाम्रो खेलकुद)– मोफसलको सर्वाधिक पुरस्कार राशीको नेपाल आइस सुदूरपश्चिम खप्तड गोल्ड कपफुटबल प्रतियोगिताको पुरस्कार राशीमा अर्को वर्ष झन्डै दोब्बरले बृद्धि हुने भएको छ । तेस्रो संस्करणको खप्तड गोल्ड कपको विजेतालाई २१ लाख रुपैयाँ दिने आयोजक सुदूरपश्चिम ११ स्पोर्टस क्लबले घोषणा गरेको छ ।

सोमबार दोस्रो संस्करणको फाइनलका दौरान सुदूरपश्चिमले पुरस्कार राशीमा बुद्धि गरिने जानकारी दिएको हो ।विजेतालाई मात्र होइन उपविजेता टोलीले पनि अर्को वर्ष १० लाख ५० हजार रुपैयाँ पाउने आयोजक क्लबले जनाएको छ । स्थानिय व्यक्तिहरुको हौसला र विश्वासका कारण पुरस्कार राशीमा बृद्धि गर्न सफल भएको आयोजक क्लबका अध्यक्ष सुदेश हमालले हाम्रो खेलकुद डट कमलाई बताएका छन् ।

यो वर्षको विजेताले भने ११ लाख ११ हजार १ सय ११ तथा दोस्रो हुने टोलीले ५ लाख ५५ हजार ५ सय ५५ रुपैयाँ प्राप्त गर्नेछ । इटहरीमा माघ ५ गते देखि सुरु हुने मदन भण्डारी स्मृति गोल्ड कपको विजेताले १२ लाख रुपैयाँ पाउने घोषणा गरिएको छ ।

सुदूरपश्चिमको पहिचान बनेको खप्तड गोल्ड कपको पहिलो संस्करणको विजेताले ५ लाख रुपैयाँ प्राप्त गरेको थियो । खप्तड गोल्ड कपको सफलतासँग आयोजक हौसिएर पुरस्कार राशीमा व्यापक बृद्धि गरेका बताइएको छ ।

आयोजक क्लबको हिजो बसेको बैठकले पुरस्कार राशीमा बृद्धि गर्ने निर्णय गरेको थियो । छलफलमा विजेतालाई २६ लाख रुपैयाँ सम्म दिने चर्चा भएपनि २१ लाख रुपैयाँमा सहमति भएको क्लबका एक पदाधिकारी जानकारी दिए ।