म्याड्रिड (एजेन्सी) – अन्तिम समयको गोलसँगै भिल्लारियलले ला लिगा अन्तर्गत साबिक विजेता रियल म्याड्रिडलाई उसैको घरेलु मैदानमा १-० ले पराजित गरेको छ । रियलले थुप्रै मौका गुमाएपछि ८७ औं मिनेटमा पाब्लो फोर्नाल्सको एकमात्र गोल निर्णायक साबित भयो । ला लिगामा रियलविरुद्ध भिल्लारियलको यो पहिलो जित हो । 

रियलले पहिलो हाफको १४ औं मिनेटमा गोल गरेपनि ग्यारेथ बेलको गोललाई अफसाइडका कारण मान्यता दिइएन । खेलको ३० औं मिनेटका क्रिस्टियानो रोनाल्डोले रियललाई अग्रता दिलाउने मौका पाएपनि उनले भिल्लारियलका गोल किपर सर्जियो असेन्जोसँगको ‘वोन अन वन’ मा फ्रेम बाहिर प्रहार गर्दै सुनौलो अवसर खेर फालेका थिए । त्यस्तै इसकोले दिएको पासमा बेलले ४२ औं मिनेटमा उनको कमजोर दाँया खुट्टाले गरेको प्रहार पनि बाहिरिएपछि पहिलो हाफ गोल रहित अन्त्य भयो ।

दोस्रो हाफमा पनि घरेलु टोलीले गोल गर्ने प्रयास गर्यो तर सफल भएन । एकातर्फ रियलको गोल गर्ने प्रयास विफल हुँदा खेलको ८७ औं मिनेटमा काउन्टर एट्याकमा फोर्नाल्सले भ्रमणकारी टोलीलाई विजयी गोल दिलाए । पहिलो पटक इनेस उनाल्सको प्रहार गोलकिपर नाभासले रोकेपनि फोर्नाल्सले रिबाउन्डमा गोल गर्दै भिलारियललाई अग्रता दिलाए । रिबाउन्डमा पाएको बललाई गोलकिपर नाभासमाथि चालाखीपूर्ण चिप गर्दै उनले गोल गरे । बाँकी समय र थापिएको ३ मिनेटको इन्जुरी समयसम्म अग्रता जोगाउँदै भिल्लारियलले रियललाई घरेलु मैदानमा स्तब्ध बनाएको हो ।

यो हारसंगै रियलको १८ खेलमा ३२ अंक छ । चौथो स्थानमा रहेको रियल शिर्ष स्थानको बार्सिलोना भन्दा १६ अंक तल छ । त्यस्तै ३१ अंक सहित भिल्लारियल पाचौं स्थानमा उक्लिएको  छ ।

आइतबार ०७:१० मा सच्चाइएको