म्यानचेस्टर (एजेन्सी)– पेरिस सेन्ट जर्मेन (पिएसजी) का सुपर स्टार नेयमार भित्राउन चासो देखाउनेमा अब प्रिमियर लिग टोली म्यानचेस्टर युनाइटेड पनि थपिएको छ । पछिल्लो एक प्रतिवेदनका दाबी अनुसार प्रिमियर महारथी युनाइटेड समरमा नेयमारलाई लिन ४ सय ४३ मिलियन युरो खर्च गर्न समेत तयार रहेको उल्लेख छ ।

पछिल्लो समरमा पिएसजीले विश्व कीर्तिमन रकम २ सय मिलियन युरोमा बार्सिलोनाबाट नेयमारलाई भित्राएको थियो । ब्राजिलियन युवाले प्रभावशाली प्रदर्शन गर्ने क्रममा सबै प्रतियोगितामा गरि २० गोल गर्नुका साथै १२ गोलमा एसिस्ट गरेका छन् ।

पिएसजीमा नेयमार सन्तुष्ट रहन नसकेको समाचार सार्वजनिक भएसँगै उनी १२ पटकको युरोपियन च्याम्पियन रियल म्याड्रिड जाने चर्चा सुरु भएको थियो । ले १० स्पोर्टसका अनुसार २५ वर्षे स्ट्राइकर नेयमारलाई भित्राउन युनाइटेड पनि इच्छुक देखिएको छ । जसका लागि युनाइटेडले नेयमारका लागि पछिल्लो ६ महिनामा खर्च गरेको भन्दा दोब्बर तिर्न तयार भएको उल्लेख छ ।

यसअघि युनाइटेडका कार्यकारी उपाध्यक्षका इड उडवार्डले प्रारम्भिक रुपमा एन्टोनियो ग्रिजम्यानलाई किन्नको लागेको बताएका थिए । तर, पनि सरुवा रकम बढी तिर्नुपर्ने देखिएपछि युनाइटेडले ग्रिजम्यान भित्राउने योजना स्थगित गरेको थियो । अब भने युनाइटेड नेयमार भित्राउने प्रयासमा जुट्ने बताइएको छ ।

प्रिमियर लिगमा सहरी प्रतिद्वन्द्वी म्यानचेस्टर सिटीले दबदबा कायम राखेकोले पनि कडा चुनौतिका लागि पनि जोसे माउरिन्हो ठूलो रकम खर्च गरेपनि थप खेलाडी भित्राउने पक्षमा रहेका छन् । रियलले पनि नेयमार भित्राउन अभियान छाडेको छैन । यी दुई क्लबको प्रतिस्पर्धाका कारण समरमा अहिले सम्मकै ठूलो सरुवा हुन सक्ने अनुमान गरिएको छ ।