धनगढी (हाम्रो खेलकुद)– साविक विजेता लक्ष्मी हुन्डाई मनाङ मर्स्याङ्दी क्लब नेपाल आइस सुदूरपश्चिम खप्तड गोल्ड कप फुटबल प्रतियोगिताको सेमिफाइनलमा पुगेको छ । चौथो तथा अन्तिम क्वार्टरफाइनलअन्तर्गत आज अग्नी रुपन्देही ११ लाई ४–० ले हराउँदै मनाङ अन्तिम चारमा पुगेको हो ।

मनाङले अब शनिबार नै त्रिभुवन आर्मी क्लबसँग सेमिफाइनल खेल्नेछ । आर्मी रुस्लान थ्री स्टारलाई हराउँदै अन्तिम चारण्मा पुगेको थियो । मनाङको जितमा भिक्टर, विशाल राई र विमल रानाले गोल गरेका थिए । अर्को एक गोल आत्मघाती भएको थियो ।

खेल सुरु भएको १९ औं मिनेटमा भिक्टरको गोलमा मनाङले अग्रता लिएको थियो । कप्तान अनिल गुरुङको पासमा भिक्टरले गोल गरेका थिए । ५५ औं मिनेटमा रुपन्देहीका छिरिङ गुरुङको आत्मघाती गोलमा मनाङको अग्रता दोब्बर भएको हो । खेलको अन्त्यतर एक मिनेटको फरकमा दुई गोल गर्दै मनाङले जित सहज बनाएको थियो । विशालले ८३ औं र लगत्तै अर्को मिनेटमा विमलले गोल गरेका थिए ।

मनाङका भिक्टर खेलको म्यान अफ दी म्याच घोषित भए र उनले १० हजार रुपैयाँ प्राप्त गरे । अर्को सेमिफाइनल आयोजक सुदूरपश्चिम ११ र एपिएफ क्लबबीच आइतबार हुनेछ । खप्तड गोल्ड कपको विजेताले ११ लाख ११ हजार १ सय ११ रुपैयाँ प्राप्त गर्नेछ । दोस्रो हुने टोलीले ५ लाख ५५ हजार ५ सय ५५ सय रुपैयाँ प्राप्त गर्नेछ ।