धनगढी (हाम्रो खेलकुद)– यो वर्षको अहिले सम्मको सफल टोली त्रिभुवन आर्मी क्लब नेपाल आइस सुदूरपश्चिम खप्तडमा गोल्ड कपको सेमिफाइनलमा पुगेको छ । रुस्लान थ्री स्टार क्लबलाई २-१ ले हराउँदै आर्मी अन्तिम चारमा पुगेको हो । आर्मीले यो वर्ष तीन वटा नकआउट फुटबल प्रतियोगिताको उपाधि जितिसकेको छ ।

खेलको छैटौं मिनेटमा आर्मीका नवयुग श्रेष्ठले गोल गर्दै टोलीलाई अग्रता दिलाएका थिए भने दोस्रो हाफको ४९ औं मिनेटमा सुमन अर्यालले टोलीको अग्रता दोब्बर पारे । निराजन खड्काले ५३ औं मिनेटमा थ्री स्टारका लागि गोल गर्दै खेलमा फर्किने आशा देखाए पनि अन्य गोल हुन नसक्दा थ्री स्टार प्रतियोगिताबाट बाहिरिन पुग्यो ।

थ्री स्टार अखिल नेपाल फुटबल संघ (एन्फा) सँगको असन्तुष्टीका कारण एक वर्ष भन्दा लामो समय घरेलु फुटबलबाट अलग बसेको थियो । यहि प्रतियोगिताबाट थ्री स्टारले घरेलु फुटबलमा पुनरामगन गरेको थियो । जहाँ टोलीले रमपम झापा ११ लाई हराउँदै प्रतियोगितामा दमदार सुरुआत गरेको थियो ।

थ्री स्टारले पुनरागमन गर्दा राष्ट्रिय टोलीका दुई स्टार विमल घर्तीमगर र अनन्त तामाङलाई पनि समेटेको छ । त्यस्तै टोलीका पुराना खेलाडी बुद्ध चेम्जोङ पनि टोलीमा फर्केका छन् । अर्को तिर आर्मीले गत महिना सताक्षी गोल्ड कप र मेची नेत्रालय काकरभिट्टा गोल्ड कपको उपाधि जितेको थियो । त्यसअघि वैशाखमा टोलीले वीरगन्जमा विशाल स्मृति गोल्ड कपको उपाधि जितेको थियो ।

गत वर्ष पहिलो चरण पार गरेर एन्फाको लापरवाहीका कारण एएफसी कपको दोस्रो चरण खेल्न नपाएपछि थ्री स्टारले सबै खाले प्रतियोगिता बहिष्कार गर्दै आएको थियो । एन्फाबाट १ करोड ५० लाख रुपैयाँ पाउने निर्णय भएपछि थ्री स्टार फुटबलमा फर्केको थियो । खप्तड गोल्ड कपको विजेताले उपाधि सहित ११ लाख ११ हजार १ सय ११ रुपैयाँ प्राप्त गर्नेछ ।

आयोजक सुदूरपश्चिम ११ र एपिएफ यसअघि नै सेमिफाइनल पुगिसकेका छन् ।  आर्मीले साविक साविक विजेता लक्ष्मी हुन्डाई मनाङ मस्याङ्दी क्लब वा अग्नी रुपन्देही ११ मध्ये एक सँग सेमिफाइनल खेल्नेछ । अन्तिम क्वार्टरफाइनल मनाङ र रुपन्देहीबीच शुक्रबार हुनेछ ।