काठमाडौं (हाम्रो खेलकुद) – केब्स अन्तर कलेज ६-ए साइड फुटबल प्रतियोगिताको उद्घाटन खेलमा बुधवार ईस्ट पोल कलेज विजयी भएको छ ।

उद्घाटन खेलमा ईस्ट पोल कलेजले रोयल्टी कलेज ‘ए’ लाई पेनाल्टीमा २-० ले पराजित गरेको हो । निर्धारित ४० मिनेटमा दुवै टोलीले गोल गर्न नसकेपछि खेल पेनाल्टीमा पुगेको थियो । त्यस्तै, आज भएको दोस्रो खेलमा जेम्स कलेजले अरुणिमालाई १-० ले हरायो ।

त्यसैगरी, तेस्रो खेलमा आईडेल उ.मा.वि.ले बज्र कलेज माथि ३-० को जित हात पारेको छ । आज भएको अन्तिम खेलमा के.यु. सिटी कलेजले आयोजक कुमारी माथि ३-० को जित दर्ता गर्न सफल भएको हो ।

कुमारी इङलिस बोर्डिङ स्कुल (केब्स) को आयोजनामा सुरु भएको यस प्रतियोगितामा राजधानीका ११ वटा कलेजका १६ टिम प्रतिस्पर्धा गर्दै छन् । नक-आउटको आधारमा खेलिने यस प्रतियोगिता ५ दिन सम्म काठमाडौँको चावहिल तरकारी बजारको मैदानमा चल्ने छ ।

प्रतियोगितामा आयोजक कुमारी कलेज, ईस्ट पोल उ.मा.वि., रोयल्टी कलेज, जय देवकोटा कलेज, अरुणिमा उ.मा.वि., आईडेल उ.मा.वि., जेम्स कलेज, के.यु. सिटी कलेज, बज्र कलेज, कोलम्बस कलेज र द टाइम्स उच्च मा.वि. छन् ।

यस प्रतियोगिताका विजेताले नगद रु. २५ हजार र उप विजेताले नगद रु. १५ हजारसहित शिल्ड, मेडल र प्रमाणपत्र प्राप्त गर्ने छन् ।