काठमाडौं (हाम्रो खेलकुद) – विभागीय टोली नेपाल एपीएफ क्लब धनगढीमा जारी दोस्रो संस्करणको ‘नेपाल आइस सुदूरपश्चिम खप्तड गोल्डकप’ फुटबल प्रतियोगिताको सेमिफाइनलमा प्रवेश गरेको छ ।

धनगढी रंगशालामा भएको प्रतिस्पर्धात्मक खेलमा सिएमजी क्लब संकटालाई २–० ले पराजित गर्दै एपीएफ अन्तिम चारमा पुग्न सफल भएको हो । एपीएफलाई जिताउन दुवै गोल अन्जन विष्टले गरे ।

प्रतिस्पर्धात्मक बनेका खेलमा २३ औं मिनेटमा अन्जन विष्टको गोलबाट एपीएफले शुरुवाती अग्रता दिलाए । श्याम नेपालीको पासमा युवराज खड्काले भेट्न नसकेको बललाई अन्जनले हेडमार्फत गोल गर्न सफल भएका थिए ।

पहिलो हाफमा १ गोलको अग्रता लिएको एपीएफले खेल सकिन पाँच मिनेट बाँकी हुँदा अर्काे गोल गर्दै जित सुनिश्चित गरेको थियो । ८५ औं मिनेटमा अन्जनले नै गोल गर्न सफल भएका थिए ।

त्यसअघि दुवै टोलीले पाएका सुन्दर मौकाहरुलाई गोलमा परिणत गर्न सकेनन् । संकटाविरुद्ध दुई गोल गरेका अन्जन खेलको ‘म्यान अफ द म्याच’ घोषित भए । उनले १० हजार रुपैया प्राप्त गरे ।

अब एपीएफले फाइनल प्रवेशका लागि आयोजक सुदूरपश्चिम–११ स्पोर्टस क्लबसँग प्रतिस्पर्धा गर्नेछ । सुदूरपश्चिमले च्यासल युथ क्लबलाई पेनाल्टी सुटआउटमा पराजित गर्दै सेमिफाइनलमा पुग्न सफल भएको थियो । सुदूरपश्चिम र एपीएफबीचको खेल आइतबार हुनेछ ।

प्रतियोगिता अन्तर्गतको तेस्रो क्वार्टरफाइनलमा बिहिबार रुस्लान थ्री स्टार क्लबले अर्को विभागीय टोली त्रिभुवन आर्मी क्लबको सामना गर्नेछ । थ्री स्टारले रमपम झापा–११ लाई ३–१ ले पराजित गर्दै क्वार्टरफाइनलमा स्थान बनाएको हो भने आर्मी वाई पाएर क्वार्टरफाइनलमा पुगेको थियो ।

पुस २१ बाट शुरु भएको प्रतियोगिता माघ १ गतेसम्म चलनेछ । प्रतियोगिताको विजेताले ११ लाख ११ हजार १ सय ११ रुपैया प्राप्त गर्नेछ । उपविजेताले ५ लाख ५५ हजार ५५५ प्राप्त गर्नेछन् । यस्तै विभिन्न विधाका उत्कृष्ट बन्नेले समान १५-१५ हजार पाउँदा उत्कृष्ट एक खेलाडीले मोटरसाइकल पुरस्कार पाउनेछन् ।